Millət vəkilindən erməni deputata cavab: “Nə qədər ki, gec deyil...”

GÜNDƏM 26 noy 2021, 13:16
“Ermənistanda özünü siyasətçi hesab edən bəzlərinin ritorikasından açıq-aydın hiss olunur ki, bu adamlar reallıq hisslərini itiriblər. Yaranmış reallıqları ya dərk etmirlər, ya da mövcud vəziyyətlə barışa bilmirlər. Bu qisasçılıq, revanşist meyillərlə yaşamaq erməni toplumunun və Ermənistanın, sadəcə, sonunu yaxınlaşdıra bilər. Ermənistan indiki vəziyyətə aqressiv ritorikasına görə düşüb. Blokada şəraitində olan ölkə qonşu dövlətlərə nifrət aşılayır. Bu aqressiyaya son qoyulmalıdır, başqa alternativ yoxdur”.

Bunu Pravda.az-a açıqlamasında Milli Məclisin deputatı Cavid Osmanov bildirib.

Deputat vurğulayıb ki, Ermənistanda bəzi siyasətçilər sadə vətəndaşları uçuruma  sürükləyirlər: “Qisasçı ritorikadan çıxış edən erməni siyasilər özlərini sadə ermənilər, erməni xalqı üçün “qəhrəman” kimi təqdim etmək niyyətindədirlər. Hər halda, başqa xalq və ölkələrə qarşı qəzəb, kin, eyni zamanda təhqir dolu fikirlər səsləndirmək əslində ermənilərin özünün iç-üzünü  bütün dünyaya tanıtmış olur. Bu günlərdə Ermənistan parlamenitinin  deputatlarından olan Zaruhi Postanjyan adlı birinin Azərbaycan xalqı haqqında sərsəm fikirlər səsləndirməsi bu şəxsin, eyni zamanda onun təmsil etdiyi cəmiyyətin səviyyəsindən xəbər verir. O, yaxşı olar ki, sözün hər mənasında mövcud reallıqlardan çıxış etsin və başqa xalqları təhqir etmək fikrindən uzaq olsun. Bir də ki, Ermənistan mono etnik ölkədir və bu ölkədə ermənilərdən başqa digər millətlərin nümayəndələri yaşamırlar. Zaruhi Postanjyan kimi erməni siyasilərinin bu cür etik qaydalardan uzaq, sərsəm və səviyyəsiz fikirləri bir daha sübut edir ki, bunların Qafqaz dəyərlərindən heç bir xəbəri yoxdur. Zaruhi kimi düşüncədə olanların qurduqları dövlətin isə siyasəti terrordan fərqli ola bilməz. Çox təəssüflər olsun ki, ölkəmiz Azərbaycan da uzun illərdir erməni terorundan əziyyət çəkir. Əslində biz o cür siyasətçilərə əhəmiyyət verməməliyik, çünki onların fikirləri ümumi prosesə əngəl ola bilməz. Sadəcə, bəzi hallarda hədlərini aşırlar. Elə 30 il müddətində bu cür davam etdilər deyə Azərbaycan xalqı Silahlı Qüvvələrin Ali Baş Komandanı cənab İlham Əliyevin ətrafında yumruq kimi birləşərək onları diz çökdürdü. Biz yenə də humanizm dəyərlərindən çıxış edərək sülh təklif edirik, müharibənin, toqquşmanın olmasını istəmirik. Azərbaycan xalqının böyüklüyü də ondadır ki, sülhə hazırdır. Nə qədər ki, gec deyil, düşünməlidirlər. Sonra gec ola bilər...”

Demokrat.az

SEÇİLMİŞ XƏBƏRLƏR

DİGƏR XƏBƏRLƏR

XƏBƏR LENTİ
Top