Toylar da bərpa edilə bilər: amma bu qaydalarla...


SOSİAL 31 may 2021, 12:08
Dövlət pandemiyanın qarşısını almaq üçün çox böyük tədbirlər gördü. Həm modul tipli xəstəxanaların hazırlanması, həm çarpayı fondunun artırılması, həm dərman təchizatı, stasionarın təchizatı, həm də qabaqcıl ölkələrlə eyni vaxtda vaksinasiya prosesinə başlanılmasını buna misal göstərmək olar".

Demokrat.az xəbər verir ki, bunu koronavirus xəstələrinin müalicəsi ilə məşğul olan Tibb elmləri namizədi Eldar Kamranov deyib.

O bildirib ki, yumşalmalara gedilsə də müəyyən qaydalara mütləq əməl etməliyik:

"Açıq havada maska taxılmasının ləğvinin birtərəfli tərəfdarıyam. Artıq bu, bir məna kəsb etmir. Maskadan yalnız qapalı məkanlarda istifadə etmək lazımdır. Hansı ki, o məkana giriş-çıxış çoxdur. Bax, elə qapalı yerlərə girəndə maska taxmaq işimizin xeyirinədir. 

Böyük ticarət mərkəzlərinin də açılmasını təqdir edirəm. Amma orada da müəyyən qaydalara riayət etmək, maska taxmaq, məsafə saxlamaq kimi müəyyən prinsipləri gözləmək lazımdır. Bu cür ticarət mərkəzləri də işləməlidir, çünkü bu yolla da dolanan insanlar çoxdur. 

Çox vacib yumşalmalardan biri də metronun açılması qərarı oldu. Metro açılmaqla avtobuslardakı sıxlığı aradan götürəcək. Sərnişin avtobuslarındakı sıxlıq xeyli azalacaq. Metro böyük nəqliyyatdır. Sutkada 0,5 milyondan çox insan bu nəqliyyat növündən istifadə edir. Bu bizim şəhər üçün çox böyük rəqəmdir. Ona görə də müəyyən qaydaları gözləmək şərti ilə metro işləməlidir. Bununla da camaatın narahatlığı, narazılığı xeyli azalmış olacaq. 

İnsanları hazırda ən çox narahat edən məsələ də toylarla bağlı qadağanın ləğv edilməməsidir. Toy biznesi ilə xeyli insan ailəsini dolandırır. Görün nə qədər adam oradan çörək yeyir. Mənə zəng edən musiqiçilər var, deyrirlər ki, "Doktor, biz artıq alətlərimizi satırıq". Biri deyir Rusiyaya getmək istəyirəm, biri deyir taksi sürmək istəyirəm. Düşünürəm ki, toylara da müəyyən qaydalar çərçivəsində güzəştə getmək lazımdır. 300 nəfər əvəzinə 80 nəfər dəvət edilsin, 6 saat əvəzinə 3 saat keçirilsin, masa ətrafında 10-12 nəfər yox, 5 adam otursun. Bu qaydalarla toyları bərpa etməklə toy biznesini yenidən dirçəltmək lazımdır".(milli.az)


DİGƏR XƏBƏRLƏR

XƏBƏR LENTİ
Top