"Yanğın zamanı insanlar panikaya düşməməli, dərhal yerləşdiyi ərazini tərk edərək təhlükəsiz, açıq bir yerə keçməlidirlər. Hadisə tam nəzarət altına alınıncaya qədər həmin ərazidə gözləmək ən doğru davranışdır. Həm yaşayış, həm də qeyri-yaşayış binaları mütləq tüstüyə həssas sensor və detektorlarla təchiz olunmalıdır ki, yanğın və ya tüstü aşkarlandıqda dərhal xəbərdarlıq verə bilsin".
Bunu Demokrat.az-a açıqlamasında təhlükəsizlik eksperti Samir Nəbiyev deyib.
O, bildirib ki, baxımlı və bahalı yanğın sistemləri mövcud olsa da, praktik olaraq tüstü detektorları daha əlçatan və faydalıdır:
"Bundan əlavə, yanğınsöndürən balonlar və yanğın adiyalları da mütləq şəkildə mətbəxlərdə və digər riskli sahələrdə olmalıdır. Yanğın ilkin mərhələdə aşkarlanarsa, məhz bu vasitələr sayəsində geniş əraziyə yayılmasının qarşısını almaq mümkündür".
Əfsanə Kamal Demokrat.az
