"Avroviziya 2025" təmsilçimizin kimliyi fevralın ilk ongünlüyündə açıqlanacaq.
Axşam.az xəbər verir ki, bu barədə Azərbaycan nümayəndə heyətinin mətbuat xidmətinin rəhbəri Nurlana Cəfərova sosial şəbəkədə məlumat yayıb.
"Fevral ayının ilk ongünlüyündə təmsilçimizin adını açıqlamağı planlaşdırırıq. Onu da deyim ki, fevral ayı içində isə sizə mahnımızı kliplə birgə təqdim etməyi düşünürük.
Deleqasiyanın bütün üzvləri böyük həvəs və enerji ilə ən çətin mərhələdə səylə çalışır. Sizdən gözlədiyimiz, neqativ və pessimist düşüncələr deyil, bizə, ölkəmizi təmsil edəcək təmsilçimizə dəstək, xoş sözlər və çiçəklərdir" deyə, Nurlana Cəfərova bildirib.
Qeyd edək ki, İsveçrənin Bazel şəhərində keçiriləcək yarışmada Azərbaycan birinci yarımfinalın ikinci hissəsində çıxış edəcək. Birinci yarımfinal mayın 13-də keçiriləcək.
Azərbaycanla birlikdə həmin gün səhnəyə Estoniya, İslandiya, Polşa, Portuqaliya, Sloveniya, İsveç , Ukrayna, Albaniya, Belçika, Xorvatiya, Kipr, Hollandiya, Norveç, San-Marino təmsilçiləri də çıxacaq.
Yarışmanın ikinci yarımfinalı mayın 15-də, final isə 17-də keçiriləcək.
