Bakıda Yelkən Federasiyasının təşkilatçılığı və "Azərbaycan Xəzər Dəniz Gəmiçiliyi" QSC-nin (ASCO) dəstəyi ilə keçirilən "SFA Federasiya Kuboku 2024" yarışlarının qalibləri bəlli olub.
AZƏRTAC xəbər verir ki, mükafatlar "Optimist", ILCA və "Windsurf" sinifləri üzrə ən yaxşı göstəriciyə sahib olan idmançılara verilib.
Sentyabrın 19-dan start götürmüş yarışda "Open Windsurf Dostluq Kuboku"nda Elnur İsgəndərov, "ILCA 4" sinfində Fidan Ağazadə, "Optimist Junior" (12 yaşlılar) və "Optimist"də Nərgiz Məmmədova birinci yerin sahibi olub.
Mükafatları gənclər və idman naziri Fərid Qayıbov, Azərbaycan Yelkən Federasiyasının prezidenti Qüdrət Qurbanov və ağırlıqqaldırma üzrə dəfələrlə Azərbaycan çempionatlarının qalibi olmuş Asxab Kalayev təqdim edib.
Mərasimdə “Optimist” üzrə dünya və “ILCA 4” üzrə Avropa çempionatlarında iştirak edən milli üzvlərinə, cari ildəki yay məktəbinin iştirakçılarına, komandaya yeni seçilən idmançılara, eləcə də "SFA Federasiyası Kuboku 2024"ün qaliblərinə kubok, diplom və sertifikatlar təqdim olunub.
Sonda 2023-cü ildə "SFA Federasiya Kuboku"nu qazanan idmançıların adları xatirə lövhəsinə əks olunub.
Qeyd edək ki, "SFA Federasiya Kuboku" ənənəvi olaraq 7-ci ildir təşkil olunur.
