Deputat: “Fransa Ermənistana qoşun yerləşdirmək istəyirdi, İlham Əliyev qarşısını aldı”

SİYASƏT 16 noy 2022, 15:05
“Vətən müharibəsi təkcə hərb meydanında deyil, həm də dövlətlərin siyasi simasını açdığına görə böyük Qələbədir. Fransa Senatının dünənki qərarı da 2020-ci ilin noyabrın 25-də Qarabağı tanımağa çağıranların 44 günlük müharibədəki məğlubiyyətidir. Qətnamənin preambulasında BMT Nizamnaməsinə istinad olunur. Baxın, dünya təhlükəsizliyinə cavabdehlik daşıyanlar millətləri necə birləşdirir?”

Oxu.Az-ın məlumatına əsasən, bunu Milli Məclisin iclasında parlamentin İnsan hüquqları komitəsinin sədri Zahid Oruc deyib.

O bildirib ki, Senatın qərarında ikinci bənd Türkiyədən qorxunu nümayiş etdirir.

“Yunanıstanda olduğu kimi Ermənistanla sərhədlərə qoşun yığıb, Gümrüdən Rusiya hərbi qüvvələrini çıxarıb Qafqazı tutmaq istəyirlər. Xalqımız bilməlidir ki, dünən Fransa Senatında qərar çıxaranlar İstanbulun mərkəzində qanlı terrorun sifarişçiləri ilə eyni qüvvələrdir”, - deyə Zahid Oruc əlavə edib.

Fransa Senatı Xankəndi ermənilərinin təmsilçisi adı ilə Ovanes Kevorkyanı da dəvət edib. Deputat bildirib ki, bu, Qərbin siyasi riyakarlığıdır. “Sabah ölkəmizi insan hüquqları və demokratiya pozuntusunda qınayanları bir daha tanıyın. Ölkəmizə qarşı sanksiyalara çağıranlar avropalıları soyuqdan dondurmağa razıdırlar. Yelisey sarayı ilə Strasburqun parlament binası arasında məsafə cəmi 460 km-dir. Lakin dünyaya demokratiya dərsi verənlər 296-dan 295 səslə - az qala 100 faizlə qanlı totalitar diktatura olduqlarını sübut etdilər. Avropa dövlətlərində vəzifələrə yerləşən erməni şəbəkəsinə əsaslanıb deyə bilərik ki, Ermənistan kiçik, Fransa Böyük Ermənistandır.

İkinci dünya müharibəsindən sonra ataları Almaniyaya “təslimçilik aktını - sülh müqaviləsini imzalama, biz səni qoruyacağıq” deyənlərin övladları bizi təhdid edirlər. Faşizmi dirçəldən Yelisey sarayıdır”, - deyə Zahid Oruc bildirib.

Zahid Oruc xatırladıb ki, iki ay əvvəl Fransanın müdafiə naziri Sebastyan Lekorno ölkəsinin Ermənistana qoşun yeritmək niyyətində olduğunu bildirmişdi.

“Amma Prezident İlham Əliyev onun qarşısını aldı. Çıxış yolu səfirliyə hücum etmək, yumurta və pomidor atəşinə əl atmaq deyil. Ərzağa heyifdir. “Total” şirkətini Abşeron yatağından qovmaq da ölkəmizin iqtisadi izolyasiyasını istəyənlərin xeyrinədir, əksinə kompaniyanın resurslarını Avropaya və Fransa elitasına qarşı yönəltmək gərəkdir. Cavab reaksiyamız Bolqarıstandan Ağdama, Praqadan Səmərqəndə qədər Qələbəmizi möhkəmləndirən Prezidentlə bir olmaqdır.

Eləcə də şərq və Azərbaycan qadınının etirazını ləyaqətlə ifadə edən Mehriban Əliyevanın qərarına onlarla dövləti qoşmaqdır. Biz ermənilərə deməliyik: siz türklərə və azərbaycanlılara xidmət edəndə xilas olursunuz. Biz Fransa parlamentinə Şuşada yeni bəyannamələrlə cavab verməliyik. Çünki bizim müttəfiqlərimiz daha çoxdur!” - deyə komitə sədri fikrini yekunlaşdırıb.

Xatırladaq ki, noyabrın 15-də Fransa Senatında qəbul edilmiş “Azərbaycana qarşı sanksiyaların tətbiqi və onun Ermənistan ərazisindən dərhal geri çəkilməsi, 9 noyabr 2020-ci il tarixli atəşkəs razılaşmasına riayət etməsi tələbi və iki ölkə arasında dayanıqlı sülhün bərqərar olmasına yönəlmiş bütün təşəbbüslərin təşviq edilməsi” adlı qətnamə qəbul olunub.

DİGƏR XƏBƏRLƏR

XƏBƏR LENTİ
30 noy 2022, 17:57
Top