Prokuror Ramin Hacılının işindəki şahidlərin zərərçəkmiş kimi tanınmasını istədi

KRİMİNAL 27 sen 2022, 18:04
Qanunsuz miqrasiyaya görə ittiham olunan Azərbaycan Avropa Hərəkatının rəhbəri Ramin Hacılının cinayət işi üzrə məhkəmə prosesi keçirilib.

Demokrat.az
-ın xəbərinə görə, bu gün Bakı Ağır Cinayətlər Məhkəməsində hakim Azad Məcidovun sədrliyi ilə baş tutan prosesdə dövlət ittihamçısı Fariz Rzayev vəsatətlə çıxış edib.

Fariz Rzayevin vəsatəti indiyədək məhkəmədə dindirilmiş şahidlərin məhkəməyə dəvət edilərək zərərçəkmiş qismində tanınmasınıçistıyib: “Konstitusiya Məhkəməsinin qərarına görə, rüşvət verməyə təhrik ittihamı üzrə şahid qismində tanınmış şəxslər zərərçəkmiş kimi tanına bilər”. 

Ramin Hacılının vəkili Rəşad Əliyev vəsatətə etiraz edib. Bildirib ki, qanunun geriyə qüvvəsi o halda şamil olunur ki, şəxsin vəziyyətini yaxşılaşdırsın. Şəxsin vəziyyətini ağırlaşdırdığı halda qanunun qüvvəsi geriyə şamil oluna bilməz. 

Ramin Hacılı da etiraz edib: “Əgər hər şeyi bu məhkəmədə sıfırdan başlamaq istəyirsinizsə, elə işi göndərin ibtidai istintaqa, istintaq təzədən başlasın”. 
Hakim isə bu məsələyə müşavirə otağında qiymət verəcəyini deyib.

Növbəti proses oktyabrın 5-də davam edəcək.

İttihama görə, “No Border Travel Agency” MMC-nin rəhbəri Ramin Hacılı, “Gəncliyin Elmi-Mədəni İnkişafı” ictimai birliyinin sədri Sərdar İsgəndərov, “Yes Travel” MMC-nin vəzifəli şəxsləri Sərxan Abdullayev, Üzeyir Bağırlı, “HMH Baku Travel” MMC-nin rəhbəri Nərminə Dadaşova, Zakir Əmirov, Əziz Səfərəliyev, Akif Əsədov külli miqdarda qazanc əldə etmək məqsədi ilə ABŞ, Kanada və Avropa ölkələrinə səfər etmələri üçün Azərbaycan Respublikasının vətəndaşlarına viza alınması və səfər etdikləri ölkələrdə mühacir statusu alaraq yaşaya bilmələri üçün iş yerindən arayış, bank hesabından çıxarış, daşınar və daşınmaz əmlaka mülkiyyət hüququnu təsdiq edən sənədlər, hüquq mühafizə orqanlarına çağırış məktubu, guya xəsarət almalarına dair tibbi arayış və digər hüquq verən rəsmi sənədləri saxtalaşdırıb satmaqla, onlara müraciət etmiş şəxslərin qanunsuz miqrasiyalarını təşkil ediblər.

Qeyd edilənlərlə bağlı əvvəllər eyni xarakterli əməllərə görə dəfələrlə məhkum olunmuş Ramin Hacılı, eləcə də yuxarıda adları çəkilən digər şəxslər Cinayət Məcəlləsinin 178.3.1-ci (mütəşəkkil dəstə tərkibində dələduzluq) və digər maddələri ilə təqsirləndirilən şəxs qismində cəlb edilməklə, barələrində müvafiq olaraq həbs və başqa yerə getməmək haqqında iltizam qətimkan tədbirləri seçilib.

Ramin Hacılının barəsində olan cinayət işi ayrıca icraatda məhkəməyə göndərilib.

Fariz Məlikli
Demokrat.az

DİGƏR XƏBƏRLƏR

XƏBƏR LENTİ
Top