Oktyabrın 27-də VII Ümumdünya Mədəniyyətlərarası Dialoq Forumu çərçivəsində "Gülüstan" sarayında beynəlxalq təşkilatların IV Yüksək Səviyyəli Görüşü və "Bakı Prosesi"nin VI Nazirlər Görüşünün xüsusi birgə sessiyası keçirilib. "Tərəfdaşlıqdan birgə fəaliyyətə: süni intellekt dövründə mədəniyyətlərarası dialoq naminə qlobal səylərin birləşdirilməsi" mövzusuna həsr olunan sessiyada BMT-nin Sivilizasiyalar Alyansı, UNESCO, Ümumdünya Turizm Təşkilatı, Terrorçuluqla Mübarizə İdarəsi, eləcə də ICESCO, İslam Əməkdaşlıq Təşkilatı, TÜRKSOY və digər beynəlxalq qurumların rəhbər və nümayəndələri, eləcə də 15-dək ölkədən nazir və nazir müavinləri iştirak ediblər.
Azərbaycan Respublikası mədəniyyət nazirinin müavini Fərid Cəfərovun salamlama nitqi ilə açılan sessiya Sivilizasiyalar Alyansının (UNAOC) direktoru xanım Nihal Saad və UNESCO üzrə Azərbaycan Milli Komissiyasının baş katibi Elman Abdullayevin moderatorluğu ilə gerçəkləşib.
İki hissədən ibarət sessiyada süni intellekt dövründə mədəniyyətlərarası dialoqun təşviqi, beynəlxalq tərəfdaşlığın konkret birgə fəaliyyətə çevrilməsi və bu istiqamətdə səylərin əlaqələndirilməsi məsələləri müzakirə olunub.
