Adətən çiy halda salatlarda istifadə edilən kolrabi kələmi qızardıldıqda da dadlı yeməyə çevrilir. Almaniya və Avstriyada geniş istifadə olunan bu tərəvəzdən qızılı rəng alan, xırtıldayan örtüyə malik kotletlər hazırlamaq mümkündür.
Demokrat.az xəbər verir ki, Polşanın "WP Kuchnia" nəşri kolrabinin müxtəlif hazırlanma üsulları barədə məlumat yayıb.
Kolrabi zərif, bir qədər şirin dada malikdir. O, lif, C vitamini və kaliumla zəngindir. Bu tərəvəzdən salat, şorba və soba yeməkləri hazırlamaq, kartofla birlikdə rəndələyərək tərəvəz kökələri bişirmək də mümkündür.
Kolrabi kotleti üçün lazım olan ərzaqlar:
- 2 böyük kolrabi kələmi;
- 2 yumurta;
- 80 qram buğda unu;
- Yarım stəkan suxarı;
- 1 xörək qaşığı bitki yağı;
- 1 çay qaşığı kərə yağı;
- Duz, istiot və 1 çay qaşığı şirin paprika.
Hazırlanma qaydası
Əvvəlcə kolrabinin qabığı soyulur və tərəvəz təxminən 1 santimetr qalınlığında dilimlənir. Dilimlər duzlu suda 8–10 dəqiqə qaynadılır, süzülür və kağız dəsmalla yaxşıca qurudulur.
Daha sonra tərəvəz dilimlərinə istiot və paprika əlavə edilir. Hər dilim əvvəlcə una, sonra çalınmış yumurtaya, sonda isə suxarıya batırılır.
Tavada bitki yağı və kərə yağı qızdırılır. Kolrabi dilimləri hər iki tərəfi təxminən 3 dəqiqə olmaqla, üzəri qızılı rəng alıb xırtıldayana qədər qızardılır.
Yeməyi nə ilə təqdim etmək olar?
Kolrabi kotleti ət yeməklərinə alternativ olsa da, tərkibində ət və paxlalılar qədər zülal yoxdur. Buna görə də onu zülalla zəngin qidalarla birlikdə yemək məsləhət görülür. Yanında yumurta, göyərtili pendir, qatıq sousu və ya noxuddan hazırlanmış sous təqdim etmək olar.
Beləliklə, sadə tərəvəzdən hazırlanan bu yemək gündəlik menyunu müxtəlifləşdirmək üçün maraqlı seçimdir.
Jalə
