Evdə hazırlanan limonlu zefir həm təbii, həm də olduqca ləzzətli desertdir.
Demokrat.az xəbər verir ki, alma püresi əsasında hazırlanan bu şirniyyat yüngül teksturası və xoş ətri ilə seçilir.
Limonlu ev zefiri
Bu reseptə dəqiq əməl etsəniz, hətta ilk dəfə hazırlayanlar da uğurlu nəticə əldə edə bilərlər.
İnqrediyentlər:
* 2 ədəd C2 ölçülü yumurta ağı; * 300 qram şəkər; * bir çimdik limon turşusu; * 200 qram alma püresi; * 40 qram limon cemı; * 1 limonun qabıq rəndəsi; * 8 qram agar-aqar; * 150 ml su; * bir çimdik sarı qida boyası (istəyə görə); * şəkər kirşanı.
Bu reseptdə jelatin əvəzinə agar-aqar istifadə olunduğu üçün desert vegetarianlar üçün də uyğundur.
Əvvəlcə alma püresini hazırlayın. Almaları yuyub qabığını soyun, tumlarını çıxarın və xırda kub şəklində doğrayın. Qazana yerləşdirin, üzərinə 1 xörək qaşığı şəkər və 20 ml su əlavə edin. Qapağı örtülü halda, arabir qarışdıraraq təxminən 20 dəqiqə bişirin. Daha sonra blenderlə püre halına gətirin, təmiz qaba köçürün, səthinə qida plyonkası toxunduraraq örtün və tam soyudun.
Hazır alma püresindən də istifadə etmək mümkündür.
Sonra zefiri hazırlamağa başlayın. Yumurta ağlarını təmiz və quru qaba ayırın.
Qazanda alma püresi, limon qabığı rəndəsi, 150 qram şəkər, limon cemi, agar-aqar, qida boyası və suyu qarışdırın. Qarışığı zəif odda qızdırmağa başlayın.
Bu vaxt yumurta ağlarını qalan 150 qram şəkərlə mikser vasitəsilə bərk köpük alınana qədər çalın. Limon turşusunu əlavə edib daha bir dəqiqə çalmağa davam edin.
Şərbət qaynamağa başladıqdan sonra odu artırın və davamlı qarışdıraraq temperaturu 106 dərəcəyə çatana qədər bişirin. Mətbəx termometri yoxdursa, güclü qaynamadan sonra təxminən 6 dəqiqə bişirmək kifayətdir.
Hazır şərbəti oddan götürün. Mikseri aşağı sürətdə işlədərək isti şərbəti nazik axınla qabın kənarı boyunca yumurta ağına əlavə edin. Daha sonra mikseri maksimum sürətə keçirib qarışığı bərk və formasını saxlayan kütlə alınana qədər çalın.
Hazır zefir kütləsini dərhal xəmir kisəsinə doldurun və əvvəlcədən hazırlanmış perqament kağızının üzərinə sıxın. Sonra sabitləşməsi üçün bir gecə soyuducuda saxlayın.
Vacib məqam: agar-aqar çox tez bərkiyir. Buna görə də bütün mərhələləri sürətlə yerinə yetirmək lazımdır, əks halda zefir kütləsi formasını itirə bilər.
Səhər hazır zefirlərin üzərinə şəkər kirşanı səpin və süfrəyə təqdim edin.
Bu miqdarda ərzaqdan təxminən 17 ədəd zefir alınır.
Jalə Demokrat.az
