"Google Maps" vasitəsilə ünvana yönələrkən ekranda ilk görünən marşrut həmişə ən sürətlisi olmaya bilər. Tətbiq yoldakı tıxacları, yolun vəziyyətini, rahatlığını və yanacaq sərfiyyatını da nəzərə alır. Bir neçə dəqiqə belə vacibdirsə, tətbiqdəki xüsusi tənzimləməni dəyişmək lazımdır.
Tətbiqə ünvanı yazdıqdan sonra mavi xətt boyunca hərəkət etmək hər zaman ən tez çatmaq demək deyil. Tətbiq xəritəni tərtib edərkən real vaxt rejimindəki tıxacları və enerji effektivliyini ön plana çəkir.
Beləliklə, ekrana çıxan ilk variant ən sürətli yox, yanacağa qənaət edən yol ola bilər.
Naviqasiya ən sürətli yolu niyə seçmir?
Ekologiyaya qənaət funksiyası aktiv olduqda tətbiq nəqliyyat vasitəsinin az yanacaq işlətməsinə diqqət yetirir.
Xəritə yoldakı sıxlığı, meylliliyi və dayan-dur hərəkətlərini hesablayır. Tətbiq daha az enerji tələb edən marşrutu təklif edir. Bu yolun vaxtı ən sürətli variantla demək olar ki, eynidırsa, tətbiq üstünlüyü qənaətə verir. Təcili yerə tələsəndə bu detal vaxt itkisinə səbəb olur.
Məqsəd yanacağa qənaət etmək deyil, ünvana tez çatmaqdırsa, yanacaq effektivliyi funksiyasını söndürmək lazımdır.
Bunun üçün Android və iPhone cihazlarında tətbiqə daxil olmaq kifayətdir. Yuxarı sağ küncdəki profil şəklinə toxunub parametrlər bölməsinə keçin. Naviqasiya hissəsindən marşrut seçimlərinə daxil olun. "Qənaətcil marşrutlara üstünlük ver" funksiyasını söndürün.
Bu ayar bağlandıqda Google Maps əsas diqqəti ən sürətli marşruta yönəldəcək. Qənaətcil alternativlər isə ekranda yaşıl yarpaq ikonu ilə göstəriləcək. Ölkədən və tətbiqin versiyasından asılı olaraq funksiyanın adı kiçik fərqlərlə görünə bilər.
Yola çıxdıqdan sonra da marşrut parametrlərini yeniləmək mümkündür. Ekranın yuxarı sağ küncündəki menyudan variantlar hissəsinə keçərək seçimi dəyişmək olar.
Təhlükəsizlik baxımından bu prosesi avtomobili sürməzdən əvvəl etmək lazımdır. Sükan arxasında naviqasiya ilə oynamaq diqqəti yayındırır və qəza riski yaradır.
Sürətli yolun görünməməsinə ödənişli yollardan və ya magistraldan qaçmaq ayarları da səbəb ola bilər. Tətbiqdə "magistral yollardan qaç" seçimi aktivdirsə, naviqasiya sizi daha uzun yola yönəldəcək.
Eyni zamanda avtomobilin mühərrik növünü düzgün seçmək vacibdir. Benzin, dizel, hibrid və elektromobil seçimləri marşrutun hesablanmasına birbaşa təsir edir. Dizel mühərriklər magistralda, hibridlər isə şəhəriçi tıxaclarda daha qənaətcildir. Mühərrik növü qeyd edilmədikdə tətbiq avtomatik olaraq benzin avtomobili əsas götürür.
Hərəkətə başlamazdan əvvəl ekrandakı boz rəngli alternatif yolları da yoxlamaq lazımdır. Qəza və ya qəfil tıxac zamanı boz xətlə göstərilən alternativ marşrutlar daha çox vaxt qazandıra bilər.
Yəni Google Maps yanlış yol göstərmir, sadəcə istifadəçinin qənaətə, yoxsa sürətə üstünlük verdiyini təyin etməyə çalışır.
