Manipulyativ davranış, empatiya çatışmazlığı və eqosentrizm çox vaxt psixopatik xüsusiyyətlərlə əlaqələndirilir. Bunun əksinə olaraq, yüksək empatiya və mərhəmət hissi ilə seçilən insanlar da var.
Demokrat.az xəbər verir ki, "YourTango" nəşri belə insanlara xas olan doqquz xarakter xüsusiyyətini təqdim edib.
Qeyd edək ki, bu xüsusiyyətlər psixoloji mövzularda ixtisaslaşmış nəşrin müşahidələrinə əsaslanır və psixopatiyanın elmi diaqnostik meyarları hesab edilmir.
1. Səbəb olmasa belə, vicdan əzabı çəkirlər
Belə insanlar bəzən ciddi səbəb olmadan da günahkarlıq hissi keçirirlər. Mütəxəssislərin fikrincə, bu, onların başqalarının hisslərinə həssas yanaşdıqlarını göstərə bilər. Lakin həddindən artıq günahkarlıq hissi emosional tükənməyə də səbəb ola bilər.
2. Ətrafındakı insanlara qarşı diqqətli olurlar
Onlar söhbət zamanı qarşı tərəfi diqqətlə dinləyir və həmsöhbətlərinin özlərini dəyərli hiss etmələrinə çalışırlar.
3. Söhbətlərdən sonra davranışlarını təhlil edirlər
Belə insanlar söhbətdən sonra dediklərini və davranışlarını yenidən gözdən keçirir, sözlərinin qarşı tərəfə necə təsir etdiyini qiymətləndirməyə çalışırlar.
4. Hər şeyi özləri ilə əlaqələndirmirlər
Onlar başqalarının uğurlarına səmimi sevinir, diqqəti daim öz üzərlərinə çəkməyə çalışmır və qısqanclıq hissini idarə etməyi bacarırlar.
5. Qarşılıq gözləmədən yaxşılıq edirlər
Belə insanlar tanımadıqları şəxslərə belə kömək edir və bunu təşəkkür və ya hər hansı mükafat gözləmədən edirlər.
6. Özlərini müdafiə etmədən üzr istəməyi bacarırlar
Səhvlərini etiraf edir, mübahisədə qalib gəlməkdənsə problemi həll etməyə üstünlük verir və səmimi şəkildə üzr istəyirlər.
7. Çətin olsa belə, həqiqəti söyləyirlər
Yalan danışdıqda narahatlıq hiss edir və mümkün qədər dürüst olmağa çalışırlar.
8. Hər kəsə eyni hörmətlə yanaşırlar
İnsanların peşəsindən, sosial statusundan və ya maddi vəziyyətindən asılı olmayaraq, hər kəsə hörmətlə yanaşırlar.
9. İnsanlarda təhlükəsizlik hissi yaradırlar
Belə insanlar ətrafındakıların özlərini rahat və təhlükəsiz hiss etməsinə çalışır, səmimi ünsiyyət üçün etibarlı mühit yaradır və ehtiyac olduqda dəstək göstərirlər.
