Kişilər rəsmi nikaha girməkdən məsuliyyət götürmək istəmədikləri, əvvəlki uğursuz münasibətlərin təsiri və uşaqlıq dövründə formalaşmış psixoloji təsəvvürlər səbəbindən çəkinə bilərlər.
Demokrat.az xəbər verir ki, bu barədə yüksək ixtisas kateqoriyalı psixiatr və psixoterapevt Natalya Birina "İzvestiya" qəzetinə danışıb.
Onun sözlərinə görə, nikahın rəsmi qeydiyyatına qarşı davamlı qorxunun əsasında dörd əsas psixoloji ssenari dayanır.
Birinci ssenari "dəyərsizləşdirən ata" modeli ilə bağlıdır. Belə valideyn davranışı oğlan uşağında yaxın münasibətlərin kişi ləyaqətinin itirilməsi ilə nəticələndiyi düşüncəsini formalaşdırır.
İkinci ssenari isə "osminoq ana" modeli adlanır. Həddindən artıq qayğı və nəzarət nəticəsində böyüyən kişi gələcəkdə həyat yoldaşı tərəfindən tam nəzarət altına düşəcəyindən qorxa bilər.
Həkim bildirib ki, üçüncü səbəb valideynlərin nikahının əzab və xoşbəxtsizliyin simvolu kimi qəbul edilməsidir. Bu halda kişi həmin mənfi təcrübəni öz ailəsində təkrarlamaqdan ehtiyat edir.
Dördüncü ssenari isə yetkinlikdən qaçmaqla əlaqəlidir. Belə kişilər üçün nikahsız birgə yaşamaq "oğlan" mövqeyini qoruyub saxlamağa imkan verir və münasibəti hüquqi prosedurlar olmadan istənilən vaxt bitirmək hissi yaradır.
"İntimofobiya tək bir psixoloji travmanın deyil, bir neçə müdafiə mexanizminin birləşməsinin nəticəsidir. Onun aradan qaldırılması hər zaman fərdi diaqnostika tələb edir. Lakin ümumi səbəb insanın öz həyatı üzərində nəzarəti itirmək qorxusudur", deyə Birina bildirib.
Psixiatr əlavə edib ki, həqiqi nikah qorxusunu sadəcə tərəddüddən ayırmaq mümkündür. Onun sözlərinə görə, əsl qorxu vegetativ reaksiyalarla müşayiət olunur. Panika zamanı mədədə gərginlik hissi yaranır, nəfəs səthi və sürətli olur.
Bundan başqa, üzdə xırda mimik dəyişikliklər – dodaqların qeyri-simmetrik sıxılması və ya dodaqları tez-tez yalama kimi əlamətlər də müşahidə oluna bilər.
Ekspertin sözlərinə görə, periferik görmənin daralması nəticəsində baxış "donuq" görünür. Adrenalin ifrazı fonunda üz ya həddindən artıq solğunlaşa, ya da qızara bilər və insan qarşı tərəflə göz təmasını itirə bilər.
Bundan əvvəl klinik və koqnitiv-davranış psixoloqu, sxem-terapevt və ailə psixoloqu Andrey Draçev "Gazeta.Ru"ya bildirib ki, dünyada şüurlu şəkildə münasibətlərdən imtina edən insanların sayı artır. Onun sözlərinə görə, bunun əsas səbəbləri gözləntilərlə reallığın üst-üstə düşməməsi və insanların həyat prioritetlərini yenidən qiymətləndirməsidir.
