1983-cü ildə ABŞ-ın “The New York Times” qəzetində dərc olunan bu gavalı piroqu resepti illər keçməsinə baxmayaraq, hələ də ən məşhur mövsümi şirniyyatlardan biri hesab olunur.
Demokrat.az xəbər verir ki, internetin geniş yayılmadığı dövrdə evdar qadınlar reseptləri əsasən bir-birlərinə və ya övladlarına ötürürdülər. Bununla belə, bəzi reseptlər qəzet və radio vasitəsilə geniş auditoriyaya çatırdı. Məhz bu gavalı piroqu da həmin dövrün ən məşhur kulinariya əfsanələrindən birinə çevrilib.
Resepti 1983-cü ildə kulinariya yazarı Merian Berros “The New York Times” qəzetində dərc edib. Oxucuların böyük marağı səbəbindən qəzet sonrakı illərdə həmin resepti dəfələrlə yenidən çap edib.
Zamanla bu piroq ABŞ-da gavalı mövsümünün simvollarından birinə çevrilib və bir çox Hollivud filmi və serialında da yer alıb. Onun populyarlığı həm ləzzəti, həm də hazırlanmasının sadəliyi ilə izah olunur.
Tərkibi
* 115 qram kərə yağı; * 150 qram şəkər; * üzərinə səpmək üçün 2 xörək qaşığı şəkər; * 2 ədəd yumurta; * 150 qram buğda unu; * 1 çay qaşığı qabartma tozu; * 1 çimdik duz; * 10–12 ədəd “Vengerka” sortu gavalı; * 1 çay qaşığı üyüdülmüş darçın.
Əgər “Vengerka” sortu gavalı yoxdursa, bişirmə zamanı formasını saxlayan istənilən turşməzə, bərk gavalıdan istifadə etmək olar.
İstəyə görə xəmirə bir qədər vanilli şəkər və ya bir neçə damcı vanil ekstraktı da əlavə etmək mümkündür.
Hazırlanması
Əvvəlcə kərə yağını otaq temperaturunda yumşaldın. Daha sonra onu şəkərlə birlikdə açıq rəngli krem alınana qədər mikserlə çalın. Yumurtaları bir-bir əlavə edərək, hər əlavədən sonra yaxşıca qarışdırın.
Ayrı qabda ələnmiş unu, qabartma tozunu və duzu qarışdırın. Quru qarışığı tədricən yağlı kütləyə əlavə edərək hamar və qatı xəmir hazırlayın.
Diametri təxminən 23 santimetr olan dairəvi formanı kərə yağı ilə yağlayın və xəmiri bərabər şəkildə dibinə yayın.
Gavalıları yuyun, qurulayın, ikiyə bölərək çəyirdəklərini çıxarın. Onları kəsilmiş hissəsi yuxarı olmaqla xəmirin üzərinə düzün və yüngülcə basdırın.
Ayrı qabda 2 xörək qaşığı şəkəri darçınla qarışdırın və bu qarışığı piroqun üzərinə bərabər şəkildə səpin.
Sobanı 180 dərəcəyədək qızdırın və piroqu 45–50 dəqiqə ərzində, üzəri qızılı rəng alanadək bişirin.
Hazır olduqdan sonra piroqu dərhal kəsməyin. Bir qədər soyumasını gözləyin ki, gavalının şirəsi qatılaşaraq xəmirə hopsun.
Bu klassik Amerika gavalı piroqu həm isti, həm də tam soyuduqdan sonra eyni dərəcədə ləzzətli olur və çay süfrəsi üçün ideal seçim hesab edilir.
