Pizza qutularında tez-tez diqqətdən kənarda qalan kiçik plastik altlıq əslində mühüm funksiyanı yerinə yetirir. Bu sadə əşyanın konkret məqsədi var və bunu çoxları bilmir.
Demokrat.az xəbər verir ki, bu barədə "Blikk" nəşri yazır.
Pitsanın çatdırılma tarixinin 1889-cu ilə qədər uzandığı qeyd olunur. Məhz həmin ildə bu yeməyin çatdırılması ilə bağlı ilk sənədləşdirilmiş hadisə baş verib.
İtaliyanın Neapol şəhərində kraliça Marqarita korlanmış yemək yedikdən sonra qidalı və keyfiyyətli bir yemək istəyib. Onun həyat yoldaşı, kral Umberto I məşhur aşpaz Raffaele Espositoya xüsusi bir yemək hazırlamağı tapşırıb. Nəticədə aşpaz bu gün klassik hesab olunan "Marqarita" pizzasını yaradıb və onu şəxsən kraliçaya çatdırıb.
Bu hadisə müasir mənada evə çatdırılma xidməti olmasa da, məhz bundan sonra pizzanın populyarlığı sürətlə artmağa başlayıb.
II Dünya müharibəsindən sonra ABŞ-da, xüsusilə sürətli qida şəbəkələrinin inkişafı ilə birlikdə evə pizza çatdırılması geniş yayılıb.
"Domino's Pizza" şirkətinin qurucusu Tom Monahan 1960-cı ildə bu gün də istifadə edilən möhkəm, davamlı və üst-üstə yığılması rahat olan karton pizza qutusunu hazırlayıb. Lakin isti pizza buxar buraxdığı üçün qutunun içərisində yaranan nəmlik tez-tez kartonun yumşalmasına səbəb olurdu. Nəticədə qutunun qapağı içəriyə doğru əyilir və ərimiş pendirə yapışırdı. Bu isə müştərilər üçün narahatlıq yaradırdı və sadə, lakin effektiv həll tələb edirdi.
1983-cü ildə Karmela Vitale pizza qutusunun mərkəzinə yerləşdirilən plastik altlıq üçün patent alıb. Kiçik ölçülü bu ixtira qutunun qapağının pizzaya toxunmasının qarşısını alırdı. Bunun sayəsində daşınma zamanı yemək formasını və görünüşünü qoruyurdu.
İxtira bütün dünyada geniş yayılsa da, Karmela Vitale özü demək olar ki, tanınmaz olaraq qalıb. Digər ixtiraçı Elison Qriv iki il ərzində Karmela haqqında məlumat toplamağa çalışsa da, axtarışları nəticə verməyib.
Qriv bildirib ki, zamanla hətta Vitale-nin patent nümayəndələri də onun adını unutmuşdular. Halbuki bu kiçik ixtira olmasaydı, bu gün evə pizza çatdırılması prosesi tamamilə fərqli ola bilərdi.
