Münasibətlərdəki tendensiyaların daim dəyişdiyi bir dövrdə bəzi kişi xüsusiyyətləri zamanın sınağından keçərək aktuallığını qoruyub saxlayır. Qadınların 100 il əvvəl kişilərdə yüksək qiymətləndirdiyi bəzi keyfiyyətlər bu gün də öz əhəmiyyətini itirməyib.
Demokrat.az xəbər verir ki, “YourTango” nəşrinin yazdığına görə, ekspertlər tez-tez “köhnə dəbli” hesab edilən, lakin hələ də qadınlarda güclü təəssürat yaradan beş xüsusiyyəti açıqlayıblar.
Bir çox kişi hesab edir ki, onların əsas üstünlüyü zəka, iradə gücü, qətiyyət və cəsarətdir. Bu keyfiyyətlər həqiqətən də vacibdir və uğur qazanmağa kömək edir. Lakin möhkəm münasibətlər qurmaq üçün təkcə məntiq kifayət etmir.
Ekspertlərin fikrincə, səmimiyyət, xeyirxahlıq, dinləmə bacarığı və başqalarını anlamaq qabiliyyəti də az əhəmiyyət daşımır. Məhz bu xüsusiyyətlər etimad mühiti yaratmağa, yaxın insanlara dəstək olmağa və dərin emosional bağ qurmağa imkan verir.
Mütəxəssislər qeyd edirlər ki, bu keyfiyyətlər bu gün də qadınlar üçün ən cəlbedici xüsusiyyətlər sırasındadır.
Bir əsr əvvəl qadınları heyran edən və bu gün də onları valeh edən 5 “köhnə dəbli” kişi xüsusiyyəti
1. Səbir
Burada söhbət insanın həm özünə, həm başqalarına, həm də həyatın müxtəlif vəziyyətlərinə qarşı səbirli olmasından gedir. Belə kişi insanları olduğu kimi qəbul etməyi bacarır, hətta onların davranışları hər zaman onun gözləntilərinə uyğun gəlməsə belə.
Bu xüsusiyyət hər şeyi nəzarətdə saxlamağın mümkün olmadığını anlamaqdan qaynaqlanır. Buna görə də belə insanlar həyatın gözlənilməz dönüşlərinə daha sakit yanaşır, çətin vəziyyətlərdə yumor hissini itirmir və problemlərin öhdəsindən daha asan gəlirlər.
2. Yumor hissi
Əsl yumor təkcə yerində edilən zarafatlar deyil, həm də çətin şəraitdə belə müsbət məqamları görə bilməkdir. Bir çox insanlar problemlərə və gündəlik qayğılara o qədər fokuslanırlar ki, həyatın sevindirici tərəflərini görməyi unudurlar.
Yaxşı yumor hissinə malik kişi isə özünü başqalarının hesabına təsdiqləməyə çalışmır. O, həyatın çətinliklərinə təbəssümlə yanaşmağı bacarır və bu da onunla ünsiyyəti daha xoş edir.
3. Xeyirxahlıq
Xeyirxahlıq hər davranışla barışmaq demək deyil. Bu xüsusiyyət insanlara hörmət və anlayışla yanaşmaq bacarığında özünü göstərir, hətta onların hərəkətləri narazılıq doğursa belə.
Belə kişi tələsik mühakimə yürütmək əvəzinə qarşı tərəfin davranışının səbəblərini anlamağa çalışır. Münaqişə zamanı belə mehriban qalmaq bacarığı hörmət yaradır və münasibətləri möhkəmləndirir.
4. Anı yaşamaq bacarığı
Qadınlar tez-tez tərəfdaşlarının onları dinləmədiyindən şikayət edirlər. Həqiqi diqqət yalnız fiziki olaraq yanında olmaq deyil, həm də söhbətə səmimi şəkildə qoşulmaq deməkdir.
Belə kişi qarşı tərəf danışarkən cavab hazırlamaq və ya etiraz arqumentləri axtarmaq əvəzinə diqqətlə qulaq asır, deyilən sözlərlə yanaşı hissləri də anlamağa çalışır. Nəticədə qadın özünü diqqət mərkəzində, dəstəklənmiş və təhlükəsiz hiss edir.
5. Öz işinə və dəyərlərinə sadiqlik
Bu xüsusiyyət insanın öz dəyərlərinə uyğun yaşaması və həqiqi məqsədini həyata keçirməyə çalışması deməkdir. Belə kişi status və ya başqalarının rəğbəti naminə öz prinsiplərindən imtina etmir.
Yüksək gəlir və ya nüfuzlu vəzifə belə onun üçün daxili dəyərlərinə uyğun gəlmirsə, həqiqi məmnunluq gətirməyəcək. Məhz öz prinsiplərinə sədaqət, əzmkarlıq və məqsədyönlülük bir çox qadın tərəfindən xüsusilə cəlbedici xüsusiyyətlər hesab olunur.
Jalə Demokrat.az
