Azərbaycanda balıqçılıq sahəsi tamamilə yenidən qurulur. Mövcud sistem rəqəmsal formata keçirilir.
Demokrat.az-ın məlumatına görə Parlamentin Aqrar siyasət komitəsi yeni qanun layihəsini müzakirə edib. Sənəd 8 fəsil və 30 maddədən ibarətdir.
Yeni qaydalara əsasən sahə rəqəmsal idarəetməyə keçir. Balıq ehtiyatları, istifadəçilər və məhsullar elektron sistemlə izləniləcək. Bütün obyektlər, gəmilər və ov alətləri uçota alınacaq. Toplanan məlumatlar xüsusi informasiya sistemində saxlanılacaq.
Su obyektləri və vətəgələr daşınmaz əmlakın dövlət reyestrinə inteqrasiya olunacaq. Sistemlər arasında birbaşa məlumat mübadiləsi yaradılacaq.
Ov kvotaları elmi əsaslarla müəyyən ediləcək. İcazələrin verilməsi tam şəffaf olacaq. Sahədə real vaxt rejimində monitorinqlər aparılacaq. Məsafədən izləmə texnologiyaları tətbiq ediləcək. Bu addımlar qanunsuz ovun qarşısını alacaq.
Yeni sənəd qəbul edildikdən sonra köhnə qanun ləğv olunacaq. 1998-ci ilə aid qaydalar qüvvədən düşəcək.
Beləliklə, balıqçılıq sektorunda rəqəmsal nəzarət sistemi qurulur və qanunsuz fəaliyyətlərə son qoyulur.
Demokrat.az
