Sığorta mədəniyyətinin zəif inkişaf etməsi ölkədə maliyyə dayanıqlılığı və risklərin idarə olunması baxımından aktual problemlərdən biri olaraq qalır. Vətəndaşlar və bir çox sahibkarlar sığortanın əhəmiyyətinə yetərincə önəm vermirlər. Bu isə gözlənilməz hadisələr zamanı ciddi maddi itkilərin yaranmasına səbəb olur. Xüsusilə əmlak, həyat və tibbi sığorta sahələrində aşağı iştirak səviyyəsi müşahidə edilir. Maarifləndirmə işlərinin zəif olması və etimad faktorunun tam formalaşmaması bu sahənin inkişafını ləngidir. Nəticədə sığorta bazarının potensialı tam reallaşdırıla bilmir.
Məsələ ilə bağlı sığorta eksperti İlkin Nəcəfov Demokrat.az-a bildirib ki, bazarımız hələ formalaşma mərhələsindədir və yeni inkişaf edən sistem kimi qiymətləndirilə bilər:
“Bu cür vəziyyət təkcə Azərbaycana xas deyil, bir çox ölkələr öz ilkin inkişaf dövrlərində oxşar mərhələlərdən keçiblər. Sığorta sahəsində mədəniyyətin zəif olması da bu keçid dövrünün təbii nəticəsidir. Əsas məsələ ondan ibarətdir ki, bu proses zaman tələb edir və mərhələli şəkildə inkişaf edir. İqtisadi göstəricilər yüksəldikcə, əhalinin gəlirləri artdıqca sığortaya maraq da paralel olaraq güclənir. Eyni zamanda ümumi daxili məhsulun artması və iqtisadi sabitlik sığorta xidmətlərinin daha geniş yayılmasına şərait yaradır. İnsanların maariflənməsi və risklərin idarə olunması ilə bağlı biliklərin artması da bu sahənin inkişafına mühüm təsir göstərir. Nəticə etibarilə, zamanla sığorta mədəniyyətinin daha da formalaşacağı və güclənəcəyi gözlənilir”.
Beləliklə, ölkədə sığorta mədəniyyətinin formalaşması prosesi həm vətəndaşların etimadının qazanılmasından, həm də ümumi iqtisadi rifahın yüksəlməsindən asılı olan kompleks mərhələdir. Gözlənilməz risklər qarşısında maddi sabitliyi qorumağın ən effektiv yolu sığorta mexanizmlərindən düzgün istifadə etmək olsa da, mövcud potensialın tam reallaşdırılması üçün daha genişmiqyaslı maarifləndirmə fəaliyyətlərinə ehtiyac duyulur. Şirkətlərin xidmət keyfiyyətini artırması, kompensasiya proseslərinin şəffaflaşdırılması və vətəndaşların sığortaya sadəcə əlavə xərc kimi deyil, gələcəyə təminat aləti kimi baxması bu sahənin sürətli inkişafını təmin edən əsas amilə çevrilə bilər.
Leyla Turan Demokrat.az
