Yay mövsümündə həm yüngül, həm də orqanizm üçün son dərəcə faydalı yemək axtaranlar üçün məşhur kulinariya platformasının xüsusi resepti açıqlanıb. Demokrat.az xəbər verir ki, zəngin Omeqa-3 anbarı olan qızılbalığın (somon) bal və soya sousu ilə hazırlanan bu variantı əlavə yağ tələb etmədiyi üçün ideal pəhriz yeməyi hesab olunur. Cəmi 4 porsiyadan ibarət olan bu təamın hazırlanması 20 dəqiqə, bişirilməsi isə cəmi 8 dəqiqə vaxt aparır. Ev şəraitində asanlıqla hazırlaya biləcəyiniz reseptin detalları: Lazım olan komponentlər: 1. 4 ədəd qızılbalıq filesi (hər biri təxminən 170 qram) 2. 1/4 stəkan təzə keşniş yarpağı və 2 ədəd yaşıl soğan 3. 2 çay qaşığı bitki yağı və 1 çay qaşığı sürtgəcdən keçirilmiş zəncəfil 4. 2 çay qaşığı təzə laym (yaşıl limon) şirəsi 5. 2 çay qaşığı az duzlu soya sousu və 2 çay qaşığı təbii bal 6. 1 1/3 stəkan bişmiş edamame (yaşıl soya lobyası) 7. Qara küncüt toxumu, duz və istiot Hazırlanma qaydası:
İlk növbədə keşniş və yaşıl soğanı xırda doğrayıb yağ, zəncəfil, duz və istiotla qarışdırın. Balıq filetlərinin üzərində dərin kəsiklər açaraq hazırladığınız bu ot qarışığını içinə doldurun. Laym şirəsi, soya sousu və balı ayrıca bir qabda hamar olana qədər çalın. Balıqları öncədən qızdırılmış qrilə qoyub hər iki tərəfini 3-4 dəqiqə bişirin, bu əsnada ballı-soyalı sousu fırça ilə balığın üzərinə çəkin. Hazır olan yeməyi küncüt toxumları, edamame və laym dilimləri ilə bərabər süfrəyə təqdim edə bilərsiniz. Yeməyi həmçinin sobanın qril rejimində folqa üzərində 6-7 dəqiqəyə də hazırlamaq mümkündür.
Jalə Demokrat.az
