Məlumdur ki, isti su xoşagəlməz qoxuya səbəb olan mikrobları aradan qaldırmağa kömək edir. Buna görə də ekspertlər hansı əşyaların daha effektiv təmizlənməsi üçün mütləq isti suda yuyulmalı olduğunu açıqlayıb.
Demokrat.az xəbər verir ki, bu barədə “Real Simple” yazıb.
Ağ dəsmallar
Dəsmallar evdəki bir çox digər əşyadan daha çox rütubət, dəri yağı və bakteriya toplayır.
“İsti su mikrobları və xoşagəlməz qoxuya səbəb olan bakteriyaları aradan qaldırmağa kömək edir, çöküntünü təmizləyir və hopdurma qabiliyyətini bərpa edir. Dəsmallar təmiz görünə bilər, amma çox vaxt içində qalıq və bakteriya saxlayır, bu da zamanla kəskin qoxuya və funksionallığın azalmasına səbəb olur”, deyə “Lindry Lab” şirkətinin təsisçisi və tekstil lifləri üzrə mütəxəssis Linsi Boyd bildirib.
Xəstəlikdən sonra olan əşyalar
Əgər siz və ya ailə üzvləriniz xəstə olubsa, yataq dəsti, dəsmallar və pijamaların isti suda yuyulması tövsiyə olunur.
“Yüksək temperatur bakteriya, virus və parazitlərin strukturunu pozaraq onları məhv edir. İstilik onların zülal və fermentlərini dağıdır, hüceyrə membranlarını sıradan çıxarır və DNT-sini deaktiv edir”, deyə “Dirty Labs” şirkətinin həmtəsisçisi və baş elmi işçisi Pit He qeyd edib.
Ev heyvanları üçün yumşaq yataqlar və oyuncaqlar
Ev heyvanlarına aid yorğanlar, oyuncaqlar və yataq dəstləri də isti suda yuyulmalıdır. Pit He-nin sözlərinə görə, bu əşyalar tük, yağ və dəri qalıqları ilə daha çox çirklənir və dərin təmizlənməyə ehtiyac duyur.
Mütəxəssislər bu əşyaların ən azı ayda bir dəfə, ideal halda isə iki həftədən bir yuyulmasını tövsiyə edir. Bu həm də zərərvericilərin qarşısını almağa kömək edir.
Təmizlik üçün istifadə olunan salfet və bezlər
Təmizlik üçün istifadə edilən bezlər və salfetlər ən çox çirklənən əşyalardandır, çünki yağ, qida qalıqları və bakteriya toplayır.
“İsti su yağları parçalamaq və düzgün dezinfeksiya üçün əsas rol oynayır. Əks halda, bu bezlər tam təmizlənmir və bakteriyaları yaymaq riski yaradır. Mümkünsə, onları digər geyimlərdən ayrı yuyun”, deyə Boyd bildirib.
Zərərvericilərə yoluxmuş əşyalar
Kif, toz gənələri və ya həşəratlarla çirklənmiş əşyaların isti suda yuyulması vacib hesab olunur.
“Buxar və ya isti su ilə yuma dərin təmizləmə və dezinfeksiya üçün tövsiyə olunur”, deyə Pit He qeyd edib.
Bu halda uyğun yuyucu vasitələrdən istifadə edilməli və lazım gələrsə, yuma prosesi bir neçə dəfə təkrarlanmalıdır.
Yataq dəsti
Hər gecə yataq dəsti tər, dəri hüceyrələri və yağ toplayır.
“Zamanla bu yığıntılar parçaların solğunlaşmasına və xoşagəlməz qoxulara səbəb ola bilər. İsti su yağları daha effektiv parçalayır və toz gənələri kimi allergenləri azaldır”, deyə Linsi Boyd bildirib.
Jalə Demokrat.az
