Vəzifə səlahiyyətlərini aşmaqda və korrupsiya cinayətlərində ittiham olunaraq həbs edilən Biləsuvar Rayon İcra Hakimiyyətinin sabiq başçısı Mahir Quliyevin kasasiya şikayəti üzrə məhkəmənin vaxtı məlum olub.
Demokrat.az-ın əldə etdiyi məlumata görə, məhkəmə baxışı oktyabrın 17-nə təyin olunub.
Qeyd edək ki, Mahir Quliyev Ali Məhkəməyə kasasiya şikayəti verib. İş araşdırılması üçün hakim Ələsgər Novruzovun icraatına götürülüb.
Qeyd edək ki, Mahir Quliyev Dövlət Təhlükəsizliyi Xidmətinin 2020-ci il aprelin 29-da keçirdiyi əməliyyat-istintaq tədbirləri nəticəsində həbs edilib.
İstintaq orqanı tərəfindən Mahir Quliyevə Cinayət Məcəlləsinin 179-cu (mənimsəmə və israf etmə), 308.1-ci (vəzifə səlahiyyətlərindən sui-istifadə etmə), 311.3.2-ci (təkrar rüşvət alma) və 313-cü (vəzifə saxtakarlığı) maddələri ilə ittiham elan edilib.
Lənkəran Ağır Cinayətlər Məhkəməsinin hökmü ilə Mahir Quliyev 11 il azadlıqdan məhrum olunub.
Hökmə əsasən, Mahir Quliyevin 2 mənzili və 1 avtomobili dövlət nəfinə müsadirə olunub.
Şirvan Apellyasiya Məhkəməsi hökmü qüvvədə saxlayıb.
Fariz Məlikli Demokrat.az
