“Ermənistan sülh müqaviləsindən yayınmaq məqsədilə həm iki ölkə arasında şərti dövlət sərhədində, həm də Qarabağ bölgəsində hərbi ritorikadan istifadə edir. Biz bunu son günlər Zəngilan rayonu ərazisinə kəşfiyyat-təxribatçıların sızma cəhdi, o cümlədən Ağdam rayonu istiqamətində Azərbaycan Ordusunun mövqelərinin atəşə tutulması ilə görürük”.
Bu fikirləri Demokrat.az-a açıqlamasında Xəzər Müdafiə Tədqiqatları Mərkəzinin rəhbəri, hərbi ekspert Ramil Məmmədli bildirib.
Hərbi ekspert deyib ki, daha əvvəl də buna bənzər hadisələr baş verib:
“Hər dəfə də Azərbaycan Ordusu ermənilərin üstünlük qazanmaq cəhdini darmadağın edir.
Ümumiyyətlə, cəmiyyətdə Azərbaycan Ordusunun Qarabağda anti-terror əməliyyatına başlayacağına dair müəyyən fikir və istəklərə rast gəlmək olur. Əslində isə Azərbaycan Ordusu 10 noyabr 2020-ci ildə başlayaraq anti-terror əməliyyatını davam etdirir. Lokal əməliyyatlarla ermənilərin demək olar ki, əsas strateji mövqeləri nəzarətə götürülüb. Yəni ordumuz anti-terror əməliyyatını dayandırmayıb. Sadəcə olaraq bu proses rəsmi şəkildə açıqlanmır.
Hesab edirəm ki, Ermənistanın münaqişənin həllinə dair qeyri-adekvat münasibəti davam etdikcə Azərbaycanın anti-terror əməliyyatı da davam edəcək”.
Elmar Heydərli Demokrat.az
