"Həyatımda həmin 4 aylıq dövrü unutmaq istəyirəm".
Bunu "Report"a açıqlamasında "Zirə" klubunun futbolçusu Nemanya Ancelkoviç uzun müddətdən sonra yaşıl meydanlara qayıtması ilə bağlı danışarkən deyib.
25 yaşlı müdafiəçi zədəli olduğu dönəmdə ona dəstək olan hər kəsə - klub əməkdaşlarına və komanda yoldaşlarına təşəkkür etdiyini bildirib: "Artıq pozitiv düşünürəm. 4 aydan sonra meydana qayıtdığım üçün Allaha şükür edirəm. Ümid edirəm ki, daha yaxşı və güclü olacağam".
Serbiyalı oyunçu "Neftçi" ilə qolsuz heç-heçə etdikləri Azərbaycan Kubokunun yarımfinal mərhələsinin ilk matçı barədə də danışıb: "Yaxşı mübarizə apardıq. Topa daha çox sahib idik və öz oyunumuzu oynadıq. İlk matçda qol vura bilmədik, amma ikinci görüşdə bunu bacaracağımıza inanıram. Cavab qarşılaşmasında da öz oyunumuzu sərgiləməliyik. İndiyədək etdiyimiz kimi diqqətli olmalı və müsbət nəticəyə ümid etməliyik".
Mövsümün sonunda müqaviləsi başa çatan Ancelkoviç "Zirə"də qalmaq istədiyini söyləyib: "Ümid edirəm ki, tezliklə danışıqlara başlayacağıq".
Müdafiəçi Premyer Liqanın XXIV turunda "Sumqayıt"la görüşün də çox vacib olduğunu diqqətə çatdırıb: "Bizə maksimum konsentrasiya lazımdır. Qarşılaşmaya çox yaxşı hazırlaşırıq və yaxşı nəticə üçün əlimizdən gələni edəcəyik".
Ancelkoviç son olaraq hədəflərinin avrokuboklara vəsiqə qazanmaq olduğunu sözlərinə əlavə edib: "Komandamız Avropada oynamağa layiqdir. Meydandakı oyunumuzla və nəticələrlə bunu göstəriririk".
Qeyd edək ki, "Sumqayıt" - "Zirə" qarşılaşması aprelin 24-də gerçəkləşəcək. "Neftçi" və "Zirə" arasındakı cavab matçı fevralın 29-da olacaq.
Demokrat.az
