Əli Həsənov indi onu söyən keçmiş baş redaktorlarından danışdı: "O fikirdə deyiləm ki, hər şeyi ideal etmişəm..."

GÜNDƏM 16 yan 2021, 21:24
"Yenilik.az" saytının baş redaktoru Xanlar Xoca ilə Prezidentin sabiq köməkçisi Əli Həsənov arasında maraqlı dialoq yaşanıb. 

Demokrat.az
xəbər verir ki, sayt rəhbəri Əli Həsənova vaxtilə himayə etdiyi KİV rəhbərlərinin bu gün onun əleyhinə çıxışlar etdiyini xatırladıb.  

Əli Həsənov isə Xanlar Xocaya cavabında vəzifədə olarkən ideal işləmədiyini etiraf edib:

Sözügedən dialoqu olduğu kimi təqdim edirik:


Xanlar Xoca: "Əli müəllim, Allah sizə qapı açmışdı, Prezidentin etimadını qazanmışdınız,amma siz o imkandan ədalətli istifadə etmədiniz, layiq olmayanlara hər cür şərait yaradıb, hətta ofis, maliyyə imkanları verdiniz, layiq olanlar isə kənarda qaldı. Bu gün dövlətin yaratdığı imkanlardan kənarda qoyduğunuz insanlar susur, şərait yaratdığınız və sizin sayənizdə tanınıb var-dövlət sahibi olanlar sizdən imtina edir, daha yaxşı görünmək üçün öz aralarında az qala "kim daha yaxşı yıxıb-sürüyər" prinsipi ilə yarışırlar. Əlindən tutduqlarınız üzünüzə durmağa hazırdırlar. Əminəm ki, çox sarsıntı keçirirsiniz, kimlərə şərait yaratdığınızı gördükcə peşmançılıq hissi keçirirsiniz. Mən də, başqaları da möhtərəm Prezidentimizə mediadakı vəziyyətlə bağlı müraciətlərimiz gedib çatmayanda, bütün yazdıqlarımız sizin şöbədə itib-batanda eyni sarsıntını keçirmişik. Nəinki evlər, maliyyə vəsaitləri ədalətsiz şəkildə bölündü, hətta tədbirlərə belə sizin adamlar dəvət olunurdu. Bu gün həmin adamlar sizə qarşıdır, ilk daş atan da məhz onlardır, həm də axtarıb ən yekə daşları tapıb atmağa çalışırlar ki, daha yaxşı rezonans doğursun. Siz ömrünüzü vəzifədə keçirdiniz, biz də məhrumiyyətlər içərisində. Gün gəldi siz vəzifəni itirdiniz, biz də olduğumuz yerdəyik. Sonda bərabər olduq. Budur İlahi Ədalət. Sizin Ümid edirəm ki, səhvlərinizdən nəticə çıxarmaq və tövbə etmək üçün kifayət qədər zamanınız olacaq. Biz haqqımızı halal etməsək də, Allah Rəhman və Rəhimdir".

Əli Həsənov: "Xanlar Xoca, məsləhətlərinizə görə təşəkkür edirəm! Ümummilli Liderimizin gözəl bir fikri var idi. Söyləyirdi ki, “zaman hər şeyi öz yerinə qoyur”. Doğrudan da, həyatımızda hər şeyin qiymətini zaman verir. Kim nə etməliydi, yaxud etməməliydi...

Mən məmur idim, insanlara şəraiti də mənə olan münasibətlərinə görə deyil, dövlətə, hakimiyyətə münasibətə, insanlara göstərdikləri xidmətə və həmin xidmətin ictimai dəyərləndirilməsinə görə qiymət verirdim. Mən də insan idim və qətiyyən o fikirdə deyiləm ki, hər şeyi ideal etmişəm. Yalnız deyə bilərəm ki, bunun üçün maksimum çalışmışam!".


Vaqif Hüseynli
Demokrat.az

SEÇİLMİŞ XƏBƏRLƏR

DİGƏR XƏBƏRLƏR

XƏBƏR LENTİ
Top