Fransanın Ermənistana yeni silahlar göndərməsi Türkiyənin Qara dənizdə nəzarəti artırmasını labüdləşdirir —TƏHLİL

GÜNDƏM 24 fev 2024, 21:57
Xəbər verdiyimiz kimi, Ermənistan Baş naziri Nikol Paşinyan bu həftə Fransaya rəsmi səfər edib. Səfər çərçivəsində Paşinyan faktiki olaraq Rusiya ilə bütün bağları qopardığına işarə edən bəyanatlar səsləndirib. Erməni baş nazir ölkəsinin KTMT-də fəaliyyətini dondurduğunu, eyni zamanda Rusiyanın Ermənistanda bir neçə ay əvvəl çevriliş hazırladığını deməkdən belə çəkinməyib. Nikol həmçinin yaxın zamanlarda sülh müqaviləsinin imzalamayacağının da anonsunu verib.

Paşinyanın sədaqətinin “mükafatı”

Diqqətçəkən məqam isə ondan ibarətdir ki, Paşinyan səsləndirdiyi fikirlərə görə “mükafat”ını da alıb. Daha dəqiq desək, Nikol yuxarıda qeyd etdiyimiz fikirləri elə həmin “mükafat”ların qarşılığında səsləndirmişdi. Bu xidmətinin qarşılığı olaraq, erməni baş nazirə verilən “hədiyyə” isə Fransa silah-sursatları oldu.

Belə ki, fevralın 22-də “France24”də Nikolun bölgədə sülhü təhdid edən bəyanatlarla dolu müsahibəsi yayımlandı. Bir gün sonra isə əvvəlcədən planlaşdırıldığı kimi Fransanın müdafiə naziri Sebastyan Lekornu İrəvana təşrif buyurdu.

Lekornu İrəvanda erməni həmkarı Papikyanla birgə Fransanın Ermənistana silah-sursat satışını özündə əks etdirən sənədlərə qol çəkdilər. Üstəlik, Lekornu Ermənistanda Fransanın daimi hərbi müşavirinin olacağını, hətta Parisin İrəvana yaxın və orta mənzilli raketlər verə biləcəyini də elan etdi. Bir sözlə, Fransa Rusiyanı regiondan sıxışdırıb çıxarmaq, bu məqsədinə nail olmaq üçün də Ermənistanı təxribatlara çəkmək niyyətini açıq ortaya qoydu.

Silahlar Ermənistana necə gətiriləcək?

Hazırda bizim üçün əsas maraq doğuran məsələlərdən biri məhz bu sualın cavabıdır. Xatırladaq ki, ötən ilin payızında Fransa Ermənistana hücum xarakterli “Bastion” zirehli avtomobillərini göndərmişdi. Həmin texnikalar Qara dəniz vasitəsilə Gürcüstana, oradan da Ermənistana çatdırılmışdı. Yəqin ki, indi də silahların oxşar marşrutla Ermənistana daşınması planlaşdırılıb. 

Rusiya-Ukrayna müharibəsi səbəbindən Qara dənizin şimal hissəsi yük daşımaları üçün “qara zona” halına gəlib. Xüsusilə də, Qərbdən göndərilən silah-sursatı indiki vəziyyətdə Rusiyanın nəzarətində olan sulardan daşımaq kimi ağılsız addımı heç kim atmaz. Belə olan halda, silahların Qara dənizin mərkəzi hissəsindən daşınacağı ən real variant kimi görünür. 

Belə olan halda...

Fransız silahlarının Ermənistana daşınmasının coğrafi cəhətdən qarşısını ala biləcək iki ölkə var: Türkiyə və Gürcüstan. 

Bu məsələdə “zəncirin zəif halqası” Gürcüstandır. Çünki fransızlar “Bastion”ları Ermənistana göndərəndə Gürcüstan buna səs çıxarmamışdı. Bəllidir ki, Qərbin təzyiqləri və ya şirnikləndirici vədləri Tiflisi susmağa məcbur etdi. Amma Gürcüstan da artıq səhvlərindən nəticə çıxarmalı və Qərbin yalan vədlərinin onları daha əvvəl nə hala saldığını unutmamalıdırlar.

Rəsmi Tiflis onu da anlamalıdır ki, Gürcüstanın əsas müttəfiqi Fransa yox, Azərbaycandır. Bu ölkənin iqtisadiyyatı da faktiki olaraq Azərbaycandan asılıdır.

Qardaş Türkiyə Qara dənizdə nəzarəti gücləndirəcək?

Şübhəsiz ki, Ermənistanın Fransadan göndərilən silahları Azərbaycana qarşı istifadə edəcəyi hər kəsə məlumdur. Türkiyənin Azərbaycanın hərbi-strateji müttəfiqi olması isə təkcə aramızdakı qardaşlıq bağları ilə yox, həm də Şuşa bəyannaməsi ilə təsdiq olunub. 

Buna görə də, qardaş ölkənin Qara dənizdə sayıqlığını daha da artırması labüdləşib. Çünki Fransa və Ermənistan arasında dünən imzalanan müqavilə silah daşınmasının davamlı xarakter alacağını deməyə əsas verir. 

Dahi rus ədibi Çexovun da dediyi kimi, “Tamaşanın ilk pərdəsində divardan silah asılıbsa, növbəti pərdələrdə mütləq ondan istifadə olunacaq”. Yəni, Ermənistan davamlı şəkildə silahlanırsa, mütləq şəkildə onlardan istifadə edəcək. Özü də Azərbaycana qarşı...

Ona görə də, Türkiyə yəqin ki, Qara dənizdə nəzarəti artırmaqla Azərbaycana qarşı gələcək təxribatların qarşısını indidən almağa çalışacaq. Çünki ehtiyat igidin yaraşığıdır. Bu gün Fransanın Ermənistanı silahlandırmasına göz yumsaq, sabah daha böyük təxribatlarla üzləşə bilərik...(Bizim.media)

SEÇİLMİŞ XƏBƏRLƏR

DİGƏR XƏBƏRLƏR

XƏBƏR LENTİ
Top