Daşkəsəndə uçqun nəticəsində bağlanan yolda son vəziyyət — YENİLƏNİB + VİDEO

HADİSƏ 05 sen 2022, 15:47
“AzerGold” Qapalı Səhmdar Cəmiyyəti (QSC) Daşkəsən rayonunun Mollahəsənli kəndi yaxınlığında baş vermiş uçqun hadisəsi barədə məlumat yayıb.

QSC-dən APA-ya daxil olan məlumata görə, sentyabrın 3-də gecə saat 23:30 radələrində Daşkəsən rayonunun Mollahəsənli kəndi yaxınlığında torpaq uçqunu hadisəsi baş verib.

Hadisə nəticəsində təqribən 10 hektar ərazini əhatə edən torpaq kütləsi Daşkəsən rayonu ilə Mollahəsənli, Əhmədli, Şahvələdli və Dəstəfur kəndlərini birləşdirən yolun Mollahəsənli kəndindən keçən hissəsini, eyni zamanda ərazidən axan çayın qarşısını kəsib. Hadisə nəticəsində xəsarət alan olmayıb.

Uçqun hadisəsi vaxtı ilə mədən ərazisinin inzibati sərhədləri daxilində yerləşmiş, 1984-1993-cü illər ərzində Dağ-mədən Filizsaflaşdırma Kombinatı tərəfindən mədən üstaçma işləri zamanı əldə edilmiş gil qarışıqlı yararsız torpaq və qarışıq tullantı süxurları anbarı kimi istifadə edilmiş ərazidə baş verib. Torpaq kütləsinin heç bir kimyəvi qarışığı olmadığından hadisənin ətraf mühitə hər hansı bir ekoloji təsiri olmayıb.

Bildirilib ki, qeyd olunan ərazi “AzerGold” Qapalı Səhmdar Cəmiyyətinin törəmə müəssisəsi “Daşkəsən Dəmir Filiz” MMC-nin hasilat fəaliyyəti apardığı “Cənub-Şərq” mədən ərazisindən təqribən 2 kilometr aralıda yerləşdiyindən şirkətin onlarla tikinti texnikası və canlı qüvvəsi əraziyə cəlb edilərək hadisənin fəsadlarının aradan qaldırılması istiqamətində müvafiq dəstək işləri görülüb.

Hadisədən bir neçə saat sonra sözügedən kəndlərlə əlaqə təmin edilib və kiçik çayın axını məcrasına doğru yönəldilərək nəticədə daşqın və növbəti torpaq uçqunu riski aradan qaldırılıb. Bununla yanaşı, səhər saatlarına yaxın kəndin elektrik enerjisi ilə təminatı “Azərişıq” Açıq Səhmdar Cəmiyyətinin regional heyəti tərəfindən bərpa edilib. Hazırda müvafiq qurumlar tərəfindən aidiyyəti mütəxəssislər əraziyə cəlb edilib, yolun tam olaraq açılması istiqamətində işlər görülür. Paralel olaraq qeyd edilən ərazidə bu kimi hadisənin gələcəkdə yenidən baş verməməsi üçün qabaqlayıcı tədbirlər planı hazırlanır.

Qeyd edilib ki, hazırda “Daşkəsən Dəmir Filiz” MMC-nin hasilat fəaliyyəti apardığı “Cənub-Şərq” mədənində üstaçma işləri nəticəsində çıxarılmış mədən materialları (münbit torpaq qatı, boş süxur və filiz süxurları) 3 istiqamətdə daşınaraq xüsusi layihə ilə hazırlanmış anbarlarda təhlükəsizlik qaydalarına uyğun olaraq saxlanılır. “Daşkəsən Dəmir Filiz” MMC-nin mədənlərdə müvafiq fəaliyyəti beynəlxalq səviyyədə qəbul edilmiş xüsusi metodlardan istifadə edilməklə aparılır və bu kimi hadisələrin baş vermə riski yox səviyyəsindədir.


13:42

Daşkəsən rayonunun Mollahəsənli kəndində dəmir filizi qazıntıları zamanı baş verən uçqun səbəbindən bağlanan yol nəzarətə götürülüb.

Bu barədə Oxu.Az-ın sorğusuna cavab olaraq Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli məlumat verib.

O bildirib ki, hazırda yolun açılması istiqamətində işlər davam etdirilir:

“Bunun üçün əraziyə mədən tərəfindən texnikalar da cəlb edilib. Azərbaycan Avtomobil Yolları Dövlət Agentliyi tərəfindən yolun açılması istiqamətində aparılan işlər nəzarət altında saxlanılır. Çalışılır ki, qısa müddət ərzində yolda hərəkət bərpa olunsun. Hərəkət bərpa olunan kimi ictimaiyyətə bu barədə məlumat veriləcək”.


11:28

Daşkəsən rayonunda Mollasami kəndinin yolu bağlanıb.


Demokrat.az xəbər verir ki, bu barədə görüntülər sosial şəbəkədə yayılıb.

İddiaya görə, rayonda dəmir filizi qazıntıları zamanı uçqun yaranaraq yol bağalanıb.

Məsələ ilə bağlı Azərbaycan Avtomobil Yolları Dövlət Agentliyinin İctimaiyyətlə Əlaqələr şöbəsinin rəisi Anar Nəcəfli BAKU.WS-ə bildirib ki, hadisənin baş verməsindən xəbərdardır: "Hazırda mədən tərəfindən yolun açılması üçün işlər aparılır".
 


Baku.ws

SEÇİLMİŞ XƏBƏRLƏR

DİGƏR XƏBƏRLƏR

XƏBƏR LENTİ
Top