“Vətəndaşlarımız azad olunmuş ərazilərdə evlərə girərkən çox diqqətli olmalıdır"

“Müharibədən sonra ən böyük təhlükə gözəgörünməz düşmən olan minalardır. Təsadüfi deyil ki, müharibədən sonra çoxlu sayda insan minalara düşərək ya ölüb, ya da yaralanıb. Düşünürəm ki, minaların basdırılmasında qanunauyğunluq axtarmaq doğru deyil”.

Bu fikirləri Demokrat.az-a açıqlamasında hərbi jurnalist Səxavət Məmməd deyib.

O, qeyd edib ki, hələ birinci Qarabağ müharibəsi zamanı həm Azərbaycan, həm də erməni tərəfi əraziyə çoxsaylı minalar basdırıb: “Hələ mina xəritələri gündəmə gələndə belə xəritələrə güvənməməyi deyirdik. Çünki ərazidəki minaların böyük hissəsi xəritələrə işlənməyib. Bəzən insanlarımız unudur ki, Qarabağda 4 ilə qədər müharibə gedib. Elə birinci müharibə zamanı istər Azərbaycan tərəfi, istərsə də, erməni tərəfi əraziyə minalar basdırıb. O dövrdə basdırılan minalar isə heç bir xəritəyə işlənməyib. Atəşkəs razılaşmasından sonra isə təmas xətti müəyyən edildi və bundan sonra tərəflər durduqları yerləri minaladılar. Ən çox minalanmış ərazi təbii ki, təmas xətləri və neytral ərazilərdir. Həmin əraziyə hər iki tərəf çoxlu sayda mina basdırıb. Ermənilər təmas xəttindən arxada da bir neçə müdafiə zolağı yaratmışdılar. Təbii ki, gələcəkdəki hücumun qarşısını almaq üçün həmin ərazilər də minalanmışdı. Bundan əlavə, erməni tərəfi qəbirstanlıqları, insanların gedərkən ən çox can atacaqları yerləri minalamışdılar. ANAMA-nın əməkdaşları ilə söhbətimdə onlar bildirirdilər ki, minalar ən müxtəlif yerlərdən çıxa bilir. Yəni, təkcə təmas xətti minalanmış olsaydı, düşünürəm ki, o xəritəni verərdilər. Heç xəritə olmasa da, təkcə təmas xəttində axtarış aparılmaq kifayət edərdi. İkinci dünya müharibəsindən qalan minalar, mərmilər hələ də çıxır. Düşünmürəm ki, bir neçə ilə Qarabağ tamamilə minadan təmizlənsin”.

S.Məmmədin fikrincə, minalar müxtəlif yerlərdən çıxdığı üçün təhlükəsizlik məsələlərinə nəzarət etmək çox çətin məsələdir: “Qəbirstanlıqlar bu baxımdan ən təhlükəli yerlər hesab olunur. Çünki ermənilər Azərbaycan xalqının psixologiyasını yaxşı bilir və azərbaycanlıların ilk hara gedəcəyini yaxşı bilirlər. Ona görə də, ən çox qəbirstanlıqlarda, bulaq başında minaya düşənlərimiz oldu. Hətta Ağdamda hərbi hissənin ərazisindəki stadionda mina olması tam təsadüf nəticəsində aşkar edilib. Axtarış nəticəsində məlum olub ki, stadion tamamilə minalanıb. Bu tip yerlər xəritəyə salınar? Əsla. Ona görə də, mina xəritələri olsa belə, ona güvənmək olmaz. Hətta, diqqətinizə çatdırım ki, evlərin içərisindən çoxlu sayda minalar çıxarılıb. Ona görə də, vətəndaşlarımız işğaldan azad olunmuş ərazilərdə evlərə girərkən çox diqqətli olmalıdırlar. Ən çox da təmas xəttinə yaxın olmuş ərazilərə girməkdən çəkinməlidirlər. Çünki keçmiş təmas xətti istiqamətində minalar həddindən artıq çox basdırılıb. Düzənlik ərazilərdə də xeyli sayda minalar basdırılıb. Düzənlik ərazilər geniş olduğu üçün orada axtarış aparmaq o qədər də asan deyil. Buna şəxsi heyətin sayı da imkan vermir. Ona görə də, vətəndaşlarımız şübhəli bildikləri hər şeydən uzaq qaçmalıdırlar”.

Müsahimiz deyir ki, Qarabağda minalar heç də sistemli şəkildə basdırılmayıb: “Ermənilər minaları kortəbii şəkildə basıdırıblar. Erməni tərəfi daha çox zərər vermək üçün məhz belə bir addım atıb. Tapılan minaların yerləri göstərir ki, ağıla gəlməyən yerlər minalanıb. Əslində, təmizləmədəki ən böyük problem də məhz buna görədir”.

Aynurə Demokrat.az