Hyundai şirkəti yeni nəsil Elantra modelinin texniki göstəricilərini açıqlayıb. 2027-ci il Elantra sedanı tamamilə yenilənmiş dizaynı, 2028-ci ildə satışa çıxarılması planlaşdırılan hibrid versiyası və təkmilləşdirilmiş texnologiyaları ilə diqqət çəkir.
Yeni Elantra-nın ən böyük dəyişikliklərindən biri xarici görünüşündədir. Avtomobil kəskin xətləri, bucaqlı işıqlandırma elementləri və futuristik detalları ilə əvvəlki nəsildən fərqlənir. ABŞ bazarı üçün nəzərdə tutulan versiyanın qlobal təqdim edilən modellə dizayn baxımından demək olar ki, eyni olduğu bildirilir.
Yeni model əvvəlki versiyadan daha böyük ölçülərə malikdir. Təkər bazası 1,2 düym (təxminən 3 santimetr) artırılıb. Bu dəyişiklik arxa oturacaqlarda sərnişinlər üçün əlavə ayaq məsafəsi yaradır.
2027-ci model ilində satışa çıxarılacaq standart Elantra 147 at gücünə malik 2,0 litrlik, dörd silindrli mühərriklə təchiz ediləcək. Güc aqreqatı fasiləsiz dəyişən avtomatik transmissiya (CVT) ilə birləşdirilib.
Əvvəlki nəsildə daha güclü turbomühərriklə təchiz olunan N Line versiyası da mövcud idi. Lakin Hyundai yeni nəsil üçün bu modifikasiyanın təqdim ediləcəyini hələ təsdiqləməyib. Elantra N performans versiyasının isə gələcəkdə model sırasına qoşulacağı ehtimal olunur.
2028-ci ildə təqdim ediləcək Elantra Hybrid daha güclü mühərrik sistemi ilə təchiz olunacaq. 1,6 litrlik benzin mühərriki və elektrik mühərriklərinin birgə gücü 155 at gücünə çatdırılıb. Bu, əvvəlki hibrid versiya ilə müqayisədə 16 at gücü artım deməkdir.
Hyundai yeni hibrid modelin qarışıq rejimdə 53 mpg, yəni 100 kilometrə təxminən 4,4 litr yanacaq sərf edəcəyini proqnozlaşdırır. Bu göstərici əvvəlki modelin ən qənaətcil versiyasından 1 mpg aşağıdır. Hibrid modifikasiya çoxqollu arxa asqı sistemi ilə təchiz ediləcək. Standart versiyada isə burulma tirli arxa asqıdan istifadə olunur.
Avtomobilin salonunda da əhəmiyyətli yeniliklər var. Mərkəzi konsolda standart olaraq 12,9 düymlük sensor ekran yerləşdirilib. Bundan əlavə, ön şüşənin aşağı hissəsinə yaxın mövqedə quraşdırılan nazik rəqəmsal cihazlar paneli də seçim kimi təklif olunur.
Yeni Elantra Hyundai-nin Pleos Connect multimedia sistemi ilə təchiz ediləcək. Sistemin təbii danışıq dilində verilən səsli əmrləri daha yaxşı tanıdığı bildirilir. İki simsiz enerji doldurma paneli və Bang & Olufsen səs sistemi də əlavə seçimlər sırasında yer alır.
2027-ci il Elantra modelinin SE, SEL Sport və Limited komplektasiyalarında təqdim edilməsi planlaşdırılır. Hibrid versiyada isə SE Blue baza komplektasiyası olacaq.
Şirkət yeni modelin qiymətini hələ açıqlamayıb. İlkin gözləntilərə görə, standart Elantra-nın ABŞ bazarında başlanğıc qiyməti 25 min dollar ətrafında olacaq. Hibrid versiyanın isə bundan bir neçə min dollar baha olması gözlənilir.



