YapiKredi Müraciət Forması
Mazda CX-5
Sağlamlıq

Gündə 1 stəkan içənin təzyiq problemi olmur

Gündə 1 stəkan içənin təzyiq problemi olmur

Yüksək arterial təzyiqdən əziyyət çəkən şəxslərin gündəlik menyusunda qırmızı çuğundur xüsusi yer tutur. Bu tərəvəzin şirəsi qan dövranını yaxşılaşdırmaq və təzyiq göstəricilərini tənzimləmək baxımından effektiv təbii vasitə hesab olunur.

Demokrat.az bildirir ki, qırmızı çuğundurun əsas faydası tərkibindəki yüksək miqdarda təbii nitratlarla bağlıdır. Orqanizmə daxil olan nitratlar azot oksidinə çevrilir. Azot oksidi isə damar divarlarını yumşaldır, qan damarlarını genişləndirir və qan axınını rahatlaşdırır.

2024-cü ildə aparılmış genişmiqyaslı meta-analiz zamanı 349 nəfərin cəlb olunduğu 11 klinik sınağın nəticələri araşdırılıb. Məlum olub ki, hər gün çuğundur suyu içən hipertoniya xəstələrində sistolik təzyiq orta hesabla 5,31 mm civə sütunu enir. Lakin alimlər bu şirənin diastolik və sutkalıq təzyiq göstəricilərinə təsiri ilə bağlı hələlik qəti elmi sübutların olmadığını bildirirlər.

Klinik araşdırmalarda iştirakçılara gün ərzində 70 millilitrdən 250 millilitrə qədər çuğundur şirəsi verilib. Bəzi tədqiqatlar göstərir ki, təxminən 250 millilitr həcmində gündəlik istehlak daha müsbət nəticələr verir. Buna baxmayaraq, həmin ölçü hər kəs üçün sabit norma sayılmır və fərdi sağlamlıq vəziyyətinə görə dəyişə bilər.

Həkimlər xəbərdarlıq edirlər ki, qırmızı çuğundur suyu heç vaxt təzyiq dərmanlarını əvəz etmir.

"Təzyiqsalıcı preparatlar qəbul edən pasiyentlər bu şirəni müntəzəm içməzdən əvvəl mütləq mütəxəssislə məsləhətləşməlidirlər. Çünki dərmanla şirənin eyni vaxtda qəbulu təzyiqin kəskin şəkildə düşməsinə səbəb ola bilər".

Təzyiqi sabit saxlamaq üçün duzdan az istifadə etmək, hərəkətli həyat tərzi sürmək və həkim təyinatına ciddi əməl etmək vacibdir. Beləliklə, çuğundur şirəsi müalicə üsulu deyil, sadəcə sağlam qidalanma rasionunu tamamlayan faydalı içkidir.

Editor
Redaktor