Göz qapaqlarının ətrafında yaranan sarımtıl yağ yığıntıları bəzi insanlarda yüksək xolesterinin xaricdən görünən əlamətlərindən biri ola bilər.
Kardioloq Prof. Dr. Engin Bozkurt bildirib ki, göz qapaqları və diz ətrafında yaranan bu tip sarımtıl yığıntılar yüksək xolesterinlə əlaqəli ola bilər. Onun sözlərinə görə, xüsusilə LDL xolesterinin yüksək olması zamanla damar divarında lövhələrin yaranmasına və damarların daralmasına səbəb ola bilər.
Mütəxəssis qeyd edib ki, göz qapağındakı bu dəyişikliklər təkbaşına ürək xəstəliyi və ya infarkt göstəricisi hesab edilmir. Lakin belə əlamətlər müşahidə olunduqda xolesterin səviyyəsi və digər ürək-damar riskləri həkim tərəfindən qiymətləndirilməlidir.
Bozkurt ürək-damar xəstəliklərinin risk faktorları arasında siqaret istifadəsi, yüksək arterial təzyiq, şəkərli diabet, yüksək LDL xolesterin, artıq çəki, fiziki aktivliyin azlığı və ailədə ürək xəstəliklərinin olmasını qeyd edib.
Həkim infarktın əsas əlamətlərindən birinin sinənin ortasında təzyiq və ya sıxılma hissi olduğunu bildirib. Nəfəs darlığı, soyuq tər, ürəkbulanma, həmçinin ağrının qola, kürəyə, boyuna və ya çənəyə yayılması da infarkt əlamətləri sırasında göstərilir.
Bu simptomlar yarandıqda 112-yə zəng edilməsi və təcili tibbi yardım çağırılması tövsiyə olunur. Mütəxəssisin sözlərinə görə, infarkt zamanı damarın mümkün qədər tez açılması həyati əhəmiyyət daşıyır.
Ürək sağlamlığının qorunması üçün müntəzəm fiziki aktivlik, balanslı qidalanma, siqaretdən uzaq durmaq, qan təzyiqi, diabet və xolesterinə nəzarət etmək, həmçinin ailədə ürək-damar xəstəlikləri tarixçəsini bilmək tövsiyə olunur.
