Blinçik hazırlamaq ən nazlı və gözlənilməz mətbəx işlərindən biri hesab olunur. Eyni reseptdən istifadə edilsə belə, xəmir bəzən cırılır, tavaya yapışır və ya rezin kimi olur. Buna görə də kulinarlar daim ideal nisbətlər axtarırlar.
Demokrat.az xarici mediaya istinadən xəbər verir ki, belə reseptlərdən biri “3 stəkan” üsuludur. Bu üsulla hazırlanan blinçiklər ilk dəfədən ideal alınır. Resepti yadda saxlamaq da olduqca asandır.
Naxışlı blinçiklərin bu üsulla hazırlanmasının səbəbi əsas inqrediyentlərin — süd, su və unun — eyni həcmdə götürülməsidir. Digər məhsulların miqdarı da əsasən üç rəqəmi üzərində qurulur.
Lazım olan məhsullar:
* 1 stəkan süd; * 1 stəkan su; * 1 stəkan un; * 3 yumurta; * 3 çay qaşığı şəkər; * 3 xörək qaşığı günəbaxan yağı; * bir çimdik duz.
Burada “stəkan” şərti ölçüdür. Kiçik fincan və ya krujkadan da istifadə etmək olar. Əsas şərt süd, su və unun eyni qabla ölçülməsidir.
Blinçiklərin ideal alınması üçün yumurta və südü əvvəlcədən soyuducudan çıxarmaq məsləhətdir. Məhsullar otaq temperaturunda olduqda daha yaxşı qarışır.
Yumurtaları duz və şəkərlə hamar konsistensiya əldə edilənədək çalın. Suyu qaynadın. Yumurta qarışığına süd və unu əlavə edin. Bütün xırda topaları aradan qaldırmaq üçün çırpıcı ilə yaxşıca qarışdırın.
Daha sonra qaynar suyu nazik axınla əlavə edib yenidən çalın. Qaynar su xəmirin bir hissəsini dəmləyir və bunun sayəsində blinçiklər daha elastik olur, cırılmır. Ən sonda bitki yağını əlavə edin.
Xəmiri qızartmazdan əvvəl otaq temperaturunda təxminən 30 dəqiqə saxlamaq məsləhətdir. Bu müddət ərzində undakı qlüten şişərək xəmiri daha elastik edir. Nəticədə blinçiklər formasını yaxşı saxlayır və asanlıqla çevrilir.
Blinçikləri hər tərəfini təxminən iki dəqiqə olmaqla qızardın. Hazır blinçiklərin qurumaması üçün onların üzərini qida plyonkası və ya qazanın qapağı ilə örtmək olar.
Blinçikləri geniş kənarlı xüsusi tavada hazırlamaq daha rahatdır. Tavanı ilk blinçikdən əvvəl və daha sonra hər beşinci blinçikdən əvvəl az miqdarda yağla yağlamaq tövsiyə olunur.
Hazır blinçikləri həm şirin, həm də duzlu içliklə təqdim etmək olar. Onlar içliksiz də dadlıdır.
Jalə Demokrat.az
