Yay aylarında uşaqların sərinləmək üçün tez-tez istehlak etdiyi dondurma, meyvəli buz və soyuq içkilər düzgün şəraitdə hazırlanmadıqda və saxlanılmadıqda ciddi sağlamlıq problemlərinə səbəb ola bilər.
Demokrat.az xəbər verir ki, uşaq qastroenteroloqu dosent Nevzat Aykut Bayrak bildirib ki, gigiyena qaydalarına əməl olunmadan hazırlanan və ya soyuq zənciri pozulan məhsullar bağırsaq infeksiyası riskini artırır. Onun sözlərinə görə, dondurma və oxşar məhsulları uşaqlara tamamilə qadağan etməyə ehtiyac yoxdur. Əsas məsələ məhsulun etibarlı mənbədən alınması, düzgün saxlanılması və normadan artıq istehlak edilməməsidir.
Mütəxəssis qeyd edib ki, yay isti havalarında bakteriyalar qida məhsullarında daha sürətlə çoxalır. Xüsusilə açıq şəraitdə satılan, lazımi temperaturda saxlanılmayan və ya hazırlanma şəraiti məlum olmayan məhsullar bağırsaq infeksiyalarına səbəb ola bilər. Əriyib yenidən dondurulmuş dondurma və meyvəli buzların isə bakteriya yükü daha yüksək ola bilər.
Bağırsaq infeksiyaları uşaqlarda ishal, qusma, qarın ağrısı, qızdırma və halsızlıq kimi əlamətlərlə özünü göstərə bilər. Kiçik yaşlı uşaqlarda maye itkisi qısa müddətdə ağırlaşa bilər. Ağız quruluğu, sidik ifrazının azalması, gözlərin çökməsi, güclü halsızlıq və maye qəbul edə bilməmək kimi hallarda dərhal tibb müəssisəsinə müraciət etmək tövsiyə olunur.
Dosent Bayrak həmçinin xəbərdarlıq edib ki, qeyri-rəsmi istehsal olunan məhsullarda istifadə edilən mənşəyi məlum olmayan qatqılar və konservantlar mədə-bağırsaq sistemi ilə yanaşı, qaraciyərə də mənfi təsir göstərə bilər.
Mütəxəssis valideynlərə uşaqlar üçün dondurma və digər soyuq məhsulları yalnız etibarlı istehsalçılardan almağı, son istifadə tarixini və qablaşdırmanın vəziyyətini yoxlamağı, məhsulları günəş altında saxlamamağı və alındıqdan sonra qısa müddətdə istehlak etməyi tövsiyə edib.
Leyla Demokrat.az
