Qəhvənin müntəzəm qəbulu beynin kofeinin daimi təsirinə uyğunlaşmasına səbəb olur. Buna görə də bu içkidən qəfil imtina çox vaxt xoşagəlməz əlamətlərlə müşayiət olunur. Lakin mütəxəssislərin bildirdiyinə görə, bu dəyişikliklər adətən müvəqqəti xarakter daşıyır və bir neçə gündən sonra orqanizm yeni vəziyyətə uyğunlaşmağa başlayır.
Demokrat.az xəbər verir ki, bu barədə “Verywell Health” nəşri yazır.
Mütəxəssislər qeyd edirlər ki, kofeindən imtina əlamətlərinin şiddəti insanın gündəlik qəbul etdiyi kofeinin miqdarından asılı olaraq dəyişə bilər.
Son fincan qəhvədən 12–24 saat sonra adətən ilk əlamətlər — baş ağrısı, yorğunluq və diqqətin cəmlənməsində çətinlik müşahidə olunur. Ən ağır dövr isə çox vaxt son qəhvə qəbulundan 20–51 saat sonra baş verir.
Bu müddətdə əhval dəyişikliyi, həzm problemləri, əzələ və ya oynaq ağrıları da yarana bilər. Ümumilikdə bu əlamətlər iki gündən doqquz günədək davam edə, daha sonra isə tədricən zəifləyə bilər.
Orqanizm uyğunlaşdıqdan sonra hansı dəyişikliklər baş verir?
Kofeindən imtina dövrü başa çatdıqdan sonra bir çox insan müsbət dəyişikliklər hiss etdiyini bildirir.
Bunlara daxildir:
* yuxunun keyfiyyətinin və müddətinin yaxşılaşması; * narahatlıq və əsəbiliyin azalması; * kofeindən fiziki asılılığın aradan qalxması.
Tədqiqatçılar izah edirlər ki, kofein yuxululuq hissinə cavabdeh olan adenozinin təsirini bloklayır. İnsan qəhvə içməyi dayandırdıqda beyin yenidən uyğunlaşma mərhələsinə keçir və məhz buna görə imtina əlamətləri meydana çıxır.
Qəhvədən imtina kimlər üçün daha çətin olur?
Kofeindən imtina sindromunu araşdıran alimlər bildirirlər ki, aşağıdakı şəxslərdə əlamətlər daha ağır keçə bilər:
* gündə 300 milliqramdan çox kofein qəbul edənlər; * miqrendən əziyyət çəkənlər; * xroniki stress yaşayanlar; * yuxu rejimi pozulmuş şəxslər; * kofein tərkibli qida əlavələrindən istifadə edənlər.
Kofeindən necə daha rahat imtina etmək olar?
Merilend Universiteti”nin tədqiqatçıları qəhvəni birdən-birə dayandırmağı tövsiyə etmirlər. Onların fikrincə, qəhvə qəbulu tədricən azaldılmalı, kofeinsiz qəhvəyə keçid edilməli, kifayət qədər su içilməli, normal yuxu rejimi qorunmalı və enerji içkilərindən uzaq durulmalıdır.
Əgər baş ağrısı və ya digər əlamətlər uzun müddət davam edərsə və ya həddindən artıq güclü olarsa, həkimə müraciət etmək tövsiyə olunur.
Jalə Demokrat.az
