Düyü dünyanın ən çox istifadə olunan qarnir məhsullarından biridir və supermarketlərdə onun müxtəlif növlərinə rast gəlmək mümkündür. Bazarda adi uzun dənəli və yumru dənəli düyü ilə yanaşı, Basmati, Yasemin və digər xüsusi növlər də satışa çıxarılır.
Demokrat.az xəbər verir ki, "Express" nəşrinin məlumatına görə, düyü növləri suyu müxtəlif səviyyədə mənimsəyir ki, bu da bişirmə nəticəsində əldə olunan teksturaya birbaşa təsir göstərir. Hazırlanan qarnir daha dənəvər və ya yapışqan ola bilər. Buna görə də hər yemək üçün uyğun düyü növünü seçmək vacib hesab olunur.
Basmati düyüsü adi düyüdən nə ilə fərqlənir?
Uzun dənəli düyü dənələrinin uzunluğu enindən təxminən dörd-beş dəfə böyük olan düyü növlərinə aid edilir. Ağ və qəhvəyi uzun dənəli düyü bu kateqoriyaya daxildir.
Bu növlər bişirilərkən adətən dənələri bir-birindən ayrılmış vəziyyətdə qalır, yapışmır və sıyığa çevrilmir. Məhz buna görə plov, risotto və dənəvər tekstura tələb edən digər yeməklərin hazırlanmasında geniş istifadə olunur.
Satışda tez-tez rast gəlinən Basmati isə xüsusi düyü növüdür və əsasən Hindistan ilə Pakistanda yetişdirilir.
Hind dilində Basmati sözü "ətirlərin kraliçası" mənasını verir. Bu ad təsadüfi seçilməyib. Sözügedən düyü növü özünəməxsus qozu xatırladan ətri ilə seçilir. Bəzi insanlar onun qoxusunu qovrulmuş popkorna bənzədirlər. Bu ətir çiy halda hiss olunsa da, bişirmə zamanı daha da güclənir.
Basmati düyüsünün dənələri adi uzun dənəli düyüdən daha uzun və nazik olur. Bişirildikdə həcmcə böyüyür və nəticədə yüngül, dənəvər, lakin adi ağ uzun dənəli düyü ilə müqayisədə daha zərif və nisbətən quru tekstura əldə edilir.
Bu düyü növündən xüsusilə Cənubi Asiya və Yaxın Şərq mətbəxlərində ənənəvi yeməklərin hazırlanmasında geniş istifadə olunur.
Bişirilmə qaydası da fərqlidir
Texniki baxımdan Basmati də uzun dənəli düyü hesab olunsa da, onun ətri və görünüşü bu növü digərlərindən fərqləndirir.
Adi ağ uzun dənəli düyünü bişirməzdən əvvəl yumaq, su əlavə edib bişirmək kifayət edir.
Basmati düyüsünü isə bişirməzdən əvvəl müəyyən müddət suda islatmaq tövsiyə olunur. Bu üsul dənələrin daha möhkəm qalmasına, bişərkən qırılmamasına və qarnirin daha dənəvər alınmasına kömək edir.
Hansı düyünü seçmək lazımdır?
Seçim hazırlanacaq yeməyin növündən asılıdır.
Əgər sadə qarnir və ya xüsusi aroma tələb etməyən yemək hazırlanırsa, adi uzun dənəli düyü kifayət edir.
Lakin yeməyin ətri, rəngi və teksturası əsas rol oynayırsa, xüsusilə Şərq mətbəxinə aid ənənəvi reseptlər hazırlanırsa, Basmati düyüsünə üstünlük verilməsi daha məqsədəuyğundur.
Jalə Demokrat.az
