Gözəllik hər kəs üçün fərqli anlayış olsa da, tədqiqatçılar uzun illərdir insanların diqqətini daha çox cəlb edən fiziki xüsusiyyətləri araşdırırlar.
Demokrat.az xəbər verir ki, "Daily Mail"in yazdığına görə, fərdi zövqlər müxtəlif olsa da, bəzi xüsusiyyətlər çox sayda kişi tərəfindən daha cəlbedici hesab olunur.
"Badoo" tanışlıq platformasının yeni məlumatları internetdə kişilərin diqqətini ən çox çəkən altı fiziki xüsusiyyəti müəyyənləşdirib.
Araşdırmada boy, saç və göz rəngi, eləcə də dırnaq baxımı kimi xüsusiyyətlər qiymətləndirilib.
Bununla belə, mütəxəssislər bildirirlər ki, bu nəticələr insan münasibətlərində şəxsi uyğunluğu və qarşılıqlı hissləri proqnozlaşdırmır. Araşdırma yalnız ilk təəssürat zamanı diqqəti daha çox cəlb edən xüsusiyyətlər barədə ümumi təsəvvür yaradır.
Məlumata görə, aşağıdakı xüsusiyyətlərə malik qadınlar tanışlıq platformasında kişilərdən daha çox mesaj və cavab alıblar.
1. Orta boy
"Badoo"nun məlumatına əsasən, kişilərin 46 faizi boyu 160–167 santimetr arasında olan qadınlara üstünlük verir.
Bununla belə, mütəxəssislər qeyd edirlər ki, daha hündür və ya daha alçaq boylu qadınlara üstünlük verən kişilər də az deyil. Sadəcə, tanışlıq tətbiqlərində bu boy aralığı daha çox diqqət çəkir.
2. Qəhvəyi gözlər
Filmlərdə və mahnılarda tez-tez mavi gözlər romantikləşdirilsə də, "Badoo"nun məlumatına görə, qəhvəyi gözlü qadınlar kişilərdən daha çox mesaj alırlar.
"YourTango"nun məlumatına əsasən, sorğuda iştirak edən kişilərin təxminən 60 faizi digər göz rəngləri ilə müqayisədə qəhvəyi gözlərə üstünlük verib.
Bəzi mütəxəssislər isə hesab edirlər ki, göz rəngindən daha çox göz təması mühüm rol oynayır.
3. Tünd saçlı qadınlar
Araşdırmaya görə, tanışlıq tətbiqlərində tünd saçlı qadınlar sarışınları geridə qoyublar.
"Badoo"nun məlumatına əsasən, qəhvəyi saçlı qadınlar mesajların 40 faizini aldığı halda, sarışın qadınların payına 15 faiz düşüb.
Digər araşdırmalar da göstərir ki, saç ilk təəssüratın formalaşmasında mühüm rol oynayır.
4. Orta bədən quruluşu
Araşdırmanın ən maraqlı nəticələrindən biri bədən quruluşu ilə bağlı olub.
"Badoo" müəyyən edib ki, "orta" bədən quruluşuna malik qadınlar atletik bədən quruluşuna malik qadınlardan daha çox diqqət çəkirlər.
Tədqiqatçılar bildirirlər ki, bu nəticə gözəllik standartlarının sosial şəbəkələrdə təqdim olunduğundan daha müxtəlif olduğunu göstərir.
Bundan əlavə, 2015-ci ildə Ostindəki Texas Universitetinin apardığı araşdırma kişilərin bel ilə omba arasında təxminən 45,5 dərəcə əyriliyə malik qadınları daha cəlbedici hesab etdiyini ortaya qoyub. Alimlərin fikrincə, bu xüsusiyyət keçmişdə hamiləlik zamanı üstünlük yaratdığı üçün təkamül baxımından əhəmiyyət daşıyıb.
5. Səliqəli və baxımlı dırnaqlar
Məlumatlara görə, təmiz və baxımlı dırnaqlara malik qadınlar internetdə kişilərin diqqətini daha çox cəlb edirlər.
Münasibətlər üzrə mütəxəssislər hesab edirlər ki, şəxsi baxım insanın özünə qayğı göstərməsi və özünəinamı barədə müsbət siqnallar verir. Son dövrlərdə təbii, laksız dırnaqlara marağın artması da bəzi qadınlar üçün üstünlük hesab olunur.
6. Səmimi təbəssüm
"Match Group" şirkətinin əvvəlki araşdırmasına əsasən, ilk görüş zamanı insanların diqqət yetirdiyi əsas xüsusiyyətlərdən biri dişlər və təbəssümdür. Sorğuda kişilərin 60 faizi, qadınların isə 71 faizi potensial tərəfdaşın təbəssümünə xüsusi diqqət yetirdiyini bildirib.
Mütəxəssislərin fikrincə, səmimi təbəssüm insanı daha açıq, müsbət və mehriban göstərir ki, bu da xüsusilə tanışlıq platformalarında digər profillər arasında seçilməyə kömək edə bilər.
Jalə Demokrat.az
