Diyetoloqlar makaronun qan şəkərinin səviyyəsinə necə təsir etdiyini və bu göstəricini nəzarətdə saxlamaq istəyənlər üçün hansı növ makaronun daha uyğun olduğunu izah ediblər. Gəlin, tam taxıllı makaronun adi makarondan nə ilə fərqləndiyini araşdıraq.
Demokrat.az xəbər verir ki, insulin müqaviməti və ya şəkərli diabet diaqnozu qoyulmuş insanlar qan şəkərinin səviyyəsini daim nəzarətdə saxlamalıdırlar. “Verywell Health” nəşrinin yazdığına görə, bütün makaron növləri qan şəkərinə təsir edir. Lakin tam taxıllı makaronun qlisemik indeksi daha aşağıdır və tərkibində daha çox lif olduğundan qan şəkərinin səviyyəsini daha az yüksəldir.
Araşdırmalar göstərir ki, karbohidrat və lifin miqdarı qan şəkərinin idarə olunmasında mühüm rol oynayır. Lif də karbohidrat növü hesab olunur, lakin digər karbohidratlarla müqayisədə daha yavaş həzm edilir və buna görə də qan şəkərində kəskin sıçrayışlara səbəb olmur.
Bundan əlavə, lif toxluq hissini daha uzun müddət saxlayır. Əgər yeməkdən sonra daha uzun müddət acmaq istəmirsinizsə, tam taxıllı makaron seçmək daha məqsədəuyğundur.
Diabetli insanlar üçün hansı makaron daha uyğundur?
Diabetdən əziyyət çəkən insanlar üçün yalnız qan şəkərinin deyil, gündəlik qəbul edilən karbohidratların miqdarının da nəzarətdə saxlanılması vacibdir. Amerika Diabet Assosiasiyasının məlumatına görə, bu baxımdan fərq böyük deyil: bir stəkan adi makaronda təxminən 42 qram, bir stəkan tam taxıllı makaronda isə 39 qram karbohidrat var.
Tam taxıllı makaron adi makarondan nə ilə fərqlənir?
Adi makaron rafinə olunmuş undan hazırlanır. İstehsal zamanı taxılın kəpəyi və rüşeymi ayrılır, yalnız endosperm hissəsi saxlanılır.
Tam taxıllı makaron isə taxılın bütün hissələrini – kəpəyi, rüşeymi və endospermi özündə ehtiva edir. Buna görə də tərkibində daha çox lif, vitamin və mineral olur və həm ümumi sağlamlıq, həm də çəkiyə nəzarət baxımından daha faydalı hesab edilir.
Mağazada faydalı makaronu necə seçmək olar?
Mütəxəssislər alış-veriş zamanı qablaşdırmanın üzərindəki məlumatı diqqətlə oxumağı tövsiyə edirlər. Məhsulun üzərində mütləq “tam taxıllı” (“whole grain”) ifadəsi qeyd olunmalıdır. “Bərk buğda sortlarından hazırlanıb” ifadəsi isə məhsulun tam taxıllı olduğu anlamına gəlmir.
ABŞ-nin Tufts Universitetinin Qidalanma və Sağlamlıq fakültəsinin məlumatına görə, makaron yeməyini daha faydalı etmək üçün ona tərəvəz, toyuq əti və ya balıq əlavə etmək məsləhətdir. Makaronun al dente – yəni bir qədər bərk qalacaq şəkildə bişirilməsi də qan şəkərinin daha sabit qalmasına kömək edə bilər.
Bundan başqa, qaymaqlı və kərə yağı əsaslı ağır souslardan, həmçinin ketçup və mayonezdən mümkün qədər uzaq durmaq tövsiyə olunur.
Jalə Demokrat.az
