Ermənistan özünü müstəqil dövlət elan etsə də elə deyil, hansısa dövlətin yedəyində gedir.
Demokrat.Az Trend-ə istinadla xəbər verir ki, bunu Milli Məclisin İctimai birliklər və dini qurumlar komitəsinin sədri Siyavuş Novruzov jurnalistlərə deyib.
S.Novruzov qeyd edib ki, Ermənistan özü nə xarici, nə də daxili siyasətində müstəqil addım ata bilmir: “Aparılan tədqiqatlar göstərir ki, ildə 100 mindən artıq insan Ermənistanı tərk edir, heç bir müəssisə və təşkilat işləmir, sosial vəziyyət acınacaqlıdır. Eyni zamanda siyasi rəhbərlikdə qarşıdurmalar var. Regionlararası münasibətlər də bir-birinə qarışıb. Bu baxımdan Ermənistanda seçki öncəsi verilən vədlərin heç 1 %-i də yerinə yetirilməyib və bundan sonra da yetirilməyəcək".
Komitə sədrinin sözlərinə görə, Ermənistanda peşəkar siyasətçilər yoxdur: "Populizmlə heç bir məsələni idarə etmək olmaz. Ortada real iş olmalıdır. Paşinyan hər ölkədə fərqli fikirlər səsləndirir. Ona görə də Ermənistanın xarici siyasəti sıfır vəziyyətindədir".
S.Novruzov qeyd edib ki, Ermənistanda orduda qarşıdurma var və bu daha da dərinləşib: "Ordudan yayınmalar həddindən artıq çoxdur. Valideynlər öz uşaqlarını Azərbaycanın işğal altında olan torpaqlarında xidmət etməyə göndərmir. Odur ki, Ermənistandakı siyasət tam şəkildə iflasa uğrayıb”.
Demokrat.Az
