Türk nazir xəbərdarlıq etdi: "III Dünya müharibəsi başlaya bilər"

Türkiyənin milli müdafifə naziri Yaşar Gülər III Dünya müharibəsinin başlaya biləcəyi ilə bağlı xəbərdarlıq edib.

Demokrat.az xəbər verir ki, Yaşar Gülər qatıldığı televiziya proqramında aparıcının "İsrail Türkiyəyə hücum edəcəkmi?" sualını cavablandırıb.

Gülər Ərdoğanın "daxili cəbhə" fikrini xatırladaraq, "Əlbəttə hücum edə bilərlər" deyib. 

"III Dünya müharibəsi hər an başlaya bilər. Təbii ki, biz belə bir şey istəmirik. Amma hər zaman hər şeyə hazır olmalıyıq", deyə nazir qeyd edib.

Bəs, həqiqətən III Dünya müharibəsinin başlaması nə qədər yaxındır?

"CNN Türk"ə danışan terror və təhlükəsizlik üzrə mütəxəssis Coşkun Başbuğ deyib: "Ola bilsin ki, müharibə qapının ağzındadır, amma bununla bağlı proqnoz vermək hələ tezdir. ABŞ-ın yeni hökumətinin necə formalaşacağı gözlənilir. Məsələn, CENTCOM-un Suriyada İsraili bəhanə edərək həyata keçirdiyi hücumlar hələ çox təzədir, iki günlük bir hadisədir. Hələlik niyə baş verməsini müzakirə edirik. Biz aylar əvvəl İsrailin Livana hücumunun təkcə Livanla məhdudlaşmayacağını, Amerika ilə əl-ələ verəcəyini və bunu Suriya və İraq torpaqlarına yaymaq istəyəcəyini söylədik. Hələ də eyni mövqedəyik".

Jalə
Demokrat.az