Sərdar Cəlaloğlu boşanmalardan danışdı: “Kişilərdə impotentlik olur, qadına lazımi zövqü vermir”

GÜNDƏM 31 may 2022, 15:04
"Boşanmış qadın və kişilər digər ailələrin dağılmasına səbəb olur". 

Bunu Cebhe.info-ya Azərbaycan Demokrat Partiyasının (ADP) sədri Sərdar Cəlaloğlu son aylarda kişilərin zorakı şəkildə övladlarının anasını evdə, küçədə, ictimai yerdə qətlə yetirməsindən, qadın qətllərinin artmasından danışarkən deyib. 

O bildirib ki, belə qurulan ailələrdə təkcə fiziki zorakılıq olmur, əmlak problemləri, uşağın tərbiyəsində ciddi nöqsanlar da yaranır: 

"Boşanmış ailələr digər ailələr üçün təhlükə yaradır. Çünki həm boşanmış kişi, həm də qadın ailəli qadın və kişilərə yaxınlaşırlar. Beləliklə, onların ailələrində problemlər yaranır. Belə şəxslərdə ən çox seksual münasibətlər önə çıxır. Bu hal dağılmamış ailələrin dağılması üçün zəmin hazırlayır. Nüvə reaksiyası kimidir. Bir ailə dağılır, həmin ailə digər iki ailənin dağılmasına səbəb olur. İki ailə də bir neçə ailənin dağlmasını sürətləndirir. Cəmiyyətdə dul insanların sayının artması ailələrin dağılmasının ən böyük təhlükələrindən birinə çevrilir. Xüsusən də indiki virtual şəbəkənin imkan verdiyi şərait evdən çıxmadan da hər cür qeyri-normal münasibətlər qurmağa imkan verir. Tutaq ki, hansısa qadın evdə otura-otura istənilən kişi ilə əlaqə yarada bilir. Bu da sonda ailələrin dağılmasına gətirib çıxardır". 

Partiya sədri belə ailələrdə yaranan münaqişələrdən, qətllərə aparan səbəblərdən danışıb: 

"Ailələrin dağılmasının əsas səbəblərdən biri seksual uyğunsuzluqdur. Ailələrə buna görə psixoloji yardım göstərilməldir. Kişilərdə impotentlik də, başqa problemlər də olur. Bəzən qadına lazım olan zövqü vermir. Təbii ki, bu da yaşanmamış həyat kompleksi yaradır. Bəzi qadınlar təlabatlarının ödənilməsi üçün kənarda yollar axtarırlar. Bir çoxları ailə qurarkən heç düşünmürlər. Bir müddət sonra ailə qurduqları şəxslər gözlərindən düşür. Boşanmaların əksəriyyəti xəyanətlə müşayiət olunur. Səbəblər çoxdur. Azərbaycanda son vaxtlar ailə institutunda çox ciddi böhranlar var. Ötən il ölkəmizdə boşananların sayı evlənənlərin sayından çox olub. Bunların çox ciddi səbəbləri var. Sosial-iqtisadi, mənzil, mənəvi-psixoloi problemlər də buraya daxildir. Adamlar real şəkildə evlənmək vəziyyətinə gəlib çatmamış ailə həyatı qururlar. Ya da ailə qurarkən başqa məsələləri nəzərdə tuturlar".

Sərdar Cəlaloğlu vəziyyətdən çıxış yolu kimi cəmiyyətdə mənəvi-əxlaqi tərbiyəni gücləndirməyin lazım olduğunu bildirib. Onun fikrincə, insanlara hədə-qorxu gəlməklə, cəzalandırmaqla onları nədənsə çəkindirmək olmaz: 

"Azərbaycanda intiharların sayı da artıb. Bu da özünə qarşı zorakılıq deməkdir. Bu, onu göstərir ki, təkcə qadınlara qarşı zorakılıqdan söhbət gedə bilməz. Azərbaycanda ümumiyyətlə, zorakılığa qarşı psixoloji iş aparılımır. İnsanların tərbiyəsi ilə bağlı ciddi iş getmir. Əksinə, zorakılığa təhrik edən verilişlər yayımlanır. Cəmiyyəti psixoloji cəhətdən sağaltmaq üçün dövlət tərəfindən siyasət həyata keçirilməlidir. Ailələrin qurulması və dağılmaması üçün qarşıya daha ciddi şərtlər qoyulmalıdır". 

Demokrat.az

DİGƏR XƏBƏRLƏR

XƏBƏR LENTİ
13 avq 2022, 00:45
Top