İşıqdan gizlənən yarasalardı...

GÜNDƏM 16 yan 2022, 18:20

Keçmiş nazirlər, vaxtilə dövlətdə yüksək post tutmuş adamlar inkişaf etmiş ölkələrdə ekspert kimi fəaliyyət göstərir, öz təcrübələrini cəmiyyətlə, xüsusilə gənclərlə bölüşürlər.

Məsələn, Türkiyənin sabiq xarici işlər naziri Hikmət Çətin "Hürriyyət" qəzetində köşə yazırdı. Çillər uzun müddət universitetdə dərs dedi. Rəhmətlik Məsud Yılmaz ömrünün sonuna kimi müxtəlif konfranslarda, seminarlarda mühazirə söylədi.

Azərbaycanda isə qəribə tendensiya hökm sürür. Bizim nazirlər işdən çıxan kimi yoxa çıxırlar.

Keçmiş Müdafiə naziri Səfər Əbiyev o gün hansısa tədbirdə görünüb. Saytların əksəriyyəti bu hadisəni günün xəbərinə çevirdi. Bəlkə də Səfər Əbiyev məhbəsdən çıxsaydı, bu qədər ajiotaj doğurmazdı.

Bilirsiniz, niyə belədir?

Çünki bu adamlar işdən çıxan kimi özlərini cəmiyyətdən təcrid edir, bir küncə çəkilib uzun illər ərzində yığdıqlarını xımır-xımır yeməklə məşğul olurlar. Tək qalmağa, qaranlıqda yaşamağa üstünlük verirlər. Özləri ilə birlikdə həm də pis əməllərinin gün işığına çıxmağından qorxurlar.

Ziya Məmmədov hardadır? Siz onun Zərdabda taxıl əkdiyinə, göyərti becərdiyinə inanırsınız?

O vaxt da yazmışdım, bu adam qoyun saxladığını deməklə, əslində, bizi qoyun yerinə qoymaq istəmişdi.

Mən də cavabını dərhal vermişdim. Yazmışdım ki, sən çoban ola bilərsən, amma biz qoyun deyilik.

Ziya müəllim uzun illər Nəqliyyat naziri işləyib. Sizcə, Azərbaycan Texniki Universitetində Yol hərəkətinin təşkili və təhlükəsizliyi fakültəsində dərs deyə bilməz? Məntiqlə, nazir işlədiyinə görə bu sahədə zəngin təcrübəsi də olmalıdır.

Niyə bu təcrübəni tələbə-gənclərlə bölüşmür?

Eyni sözləri Səfər Əbiyev haqda da demək olar? Nədən ölkənin ən stajlı generallarından olan Səfər müəllim Hərbi Akademiyada müəllim işləməsin?

Məntiqlə, işləməlidir. Amma mən işləməyini istəmirəm. Səbənini yazının axırında yazacam.

Heydər Babayev, Füzili Ələkbərov, Elmar Məmmədyarov, Əbülfəs Qarayev hardadır?

Niyə bir dəfə üzə çıxıb vaxtilə rəhbərlik etdikləri sahələrə aid məsləhət vermirlər?

Mənim ağlıma bir versiya gəlir: Bu adamların xalqın içinə çıxmağa üzləri, deməyə sözləri yoxdur.

Buna görə də öz hücrələrinə çəkilib rüşvət və korrupsiya hesabına yığdıqlarını dərman kimi üyütməklə məşğuldurlar.

Sonda Səfər Əbiyevin Hərbi Akademiyada müəllim işləməsini niyə istəmədiyimi yazım, söhbətə nöqtə qoyaq.

Səfər müəllim 18 il Müdafiə naziri işləsə də, işğal altında olan bir qarış torpağı belə azad edə bilmədi. Kursantların qarşısına hansı üzlə çıxacaq? Tutaq ki, özündə güc tapıb çıxdı. Nə deyəcək? Hansı məsləhəti verəcək? Erməninin qabağından necə qaçmağı öyrədəcək?

İgid kursant balalarımızın belə "müəllim"ə ehtiyacı yoxdur. Elə öz hücrəsində otursa yaxşıdır.

Eyni sözləri Ziya Məmmədova da şamil etmək olar. O, tələbələrə ancaq rüşvət almağın "sirlərini" öyrədə bilər. Öyrətməsə yaxşıdır.

Sözüm indiki nazirlərədir: Elə işləyin ki, sabah camaatın içinə çıxmağa üzünüz olsun. Tərki-dünya olmaq kənardan yaxşı görünmür.

Uzun illər əvvəl Səməd Vurğunun "Vaqif" dramında oxumuşdum: "İşıqdan gizlənən yarasalardır".

Seymur VERDİZADƏ

DİGƏR XƏBƏRLƏR

XƏBƏR LENTİ
25 may 2022, 22:54
Top