Soyuducudan gələn xoşagəlməz qoxunu aradan qaldırmaq üçün bahalı xüsusi vasitələr almağa ehtiyac olmaya bilər. Evdə olan adi üyüdülmüş qəhvə bu problemin müvəqqəti həllinə kömək edə bilər.
Demokrat.az xəbər verir ki, UNIAN-ın məlumatına görə, üyüdülmüş qəhvə dənələrinin məsaməli quruluşu bəzi qoxuya səbəb olan uçucu birləşmələri özündə saxlaya bilir. Bu səbəbdən qəhvə ev şəraitində qoxu uducu vasitə kimi istifadə olunur.
Bunun üçün 2-3 xörək qaşığı təzə üyüdülmüş qəhvəni kiçik bir qaba və ya boşqaba töküb soyuducunun rəflərindən birinə yerləşdirmək kifayətdir. Qəhvə bir neçə saat, hətta gecə ərzində soyuducuda saxlanıla bilər. Qoxu güclüdürsə, daha uzun müddət saxlamaq mümkündür. Qəhvə nəmləndikdə və ya təravətini itirdikdə isə yenisi ilə əvəzlənməlidir.
Bu üsul üçün qurudulmuş qəhvə çöküntüsündən də istifadə etmək olar. Mütəxəssislər iki xörək qaşığı yaxşı qurudulmuş qəhvə çöküntüsünü iki xörək qaşığı duzla qarışdırmağı tövsiyə edirlər. Qarışıq folqaya bükülür, üzərində kiçik dəliklər açılır və soyuducuya yerləşdirilir. Duz isə əlavə olaraq artıq nəmin udulmasına kömək edə bilər.
Bununla belə, qəhvə soyuducunun təmizlənməsini əvəz etmir. Xoşagəlməz qoxunun mənbəyini tapmaq üçün açıq qalmış məhsullar, meyvə-tərəvəz, pendir və kolbasa, yemək qalıqları olan qablar, tökülmüş mayelər və soyuducunun arxa hissəsindəki məhsullar yoxlanılmalıdır.
Qəhvənin öz qoxusunun soyuducuda qalmasını istəməyənlər isə alternativ olaraq qida sodasından istifadə edə bilərlər. Qida sodası da ev şəraitində qoxuların azaldılması üçün geniş istifadə olunan vasitələrdən biridir.
Jalə
