Avstraliyanın Kanberra şəhərində yaşayan Cozep Makqreyl-Beytep insan səsinin imkanlarını zorlayaraq yeni dünya rekorduna imza atıb.
Demokrat.az xəbər verir ki, gündəlik həyatda şəhər carçısı kimi çalışan Makqreyl-Beytep peşəsinin verdiyi səs üstünlüyünü rəsmi rekordla təsdiqləyib. Aparılan ölçmələrdə o, 122,4 desibel səviyyəsinə çatıb ki, bu da insan səsi üçün olduqca yüksək göstərici hesab olunur.
Bundan əvvəlki rekord 1994-cü ildə Şimali İrlandiyada bir ibtidai sinif müəlliminin “sakit olun” deyə qışqırması ilə qeydə alınıb. Annalisa Flanaqan 121,7 desibel səviyyəsinə çatmışdı. Rəqəmlər arasındakı fərq kiçik görünsə də, desibel şkalasının loqarifmik olması səbəbindən Makqreyl-Beytepin səs gücü təxminən 17 faiz daha yüksək hesab olunur. Bu səviyyə işlək elektrik mişarı, təcili yardım sirenası və ya uçuşa hazırlaşan reaktiv mühərrikin səsi ilə müqayisə edilir.
Rekord cəhdi zamanı o, ingilis dilində “now” (“indi”) sözünü qışqıraraq bu nəticəyə nail olub. Makqreyl-Beytep bu uğur üçün yeddi dəfə cəhd etdiyini bildirib. O, proses nəticəsində səs tellərinin zədələndiyini, səsinin günlərlə batdığını və tamamilə xırıltılı hala düşdüyünü qeyd edib. Belə bir cəhd üçün əvvəlcədən məşqin demək olar ki, mümkün olmadığını deyən 58 yaşlı avstraliyalı buna baxmayaraq təcrübəni maraqlı hesab etdiyini bildirib.
Ginnesin Rekordlar Kitabı bu nəticəni “ən yüksək səslə qışqıran kişi” kateqoriyasında təsdiqləyib. Beləliklə, əvvəlki qadın rekordçu Annalisa Flanaqan öz kateqoriyasında rekordunu qoruyub saxlayıb.
İnsan səsinin çatdığı bu hədd təsirli olsa da, tarixdə yaradılmış ən yüksək səs partlayışları ilə müqayisədə daha aşağıdır. Sovet İttifaqının 1961-ci ildə sınaqdan keçirdiyi 50 meqaton gücündə “Çar bombası” təxminən 224 desibel səviyyəsində səs yaradaraq bu sahədə göstərici kimi qeyd olunur.
Makqreyl-Beytep daha əvvəl də qeyri-adi rekordlarla gündəmə gəlib. O, 2019-cu ildə 10 oxu ən sürətli şəkildə atma rekordu qazanmışdı. Lakin bu nəticə uzun sürməyib və daha sonra digər idmançılar tərəfindən yenilənib.
Jalə Demokrat.az
