Rusiyada populyar ünsiyyət vasitəsi olan "Telegram"ın işində ləngimələr müşahidə olunur. Ölkənin rəqəmsal mühitə nəzarət edən qurumu olan "Roskomnadzor" platformanın fəaliyyətini məhdudlaşdırmaq üçün texniki addımlara başlayıb. 10 fevral 2026-cı il tarixinə olan son məlumatlara görə, artıq bir neçə bölgədə istifadəçilər tətbiqə girişdə və multimedia fayllarının yüklənməsində problemlərlə qarşılaşırlar.
Demokrat.az xəbər verir ki, rəsmi dairələrdən sızan məlumatlar göstərir ki, bu vəziyyət texniki nasazlıq deyil, məqsədli şəkildə həyata keçirilən "yavaşlatma" siyasətidir. Deputatlar və rəqəmsal sahə üzrə mütəxəssislər mesencerin yerli qanunvericiliyin tələblərini yerinə yetirmədiyini, xüsusən də arzuolunmaz məzmunun filtrlənməsində passiv qaldığını iddia edirlər. Buna bənzər ssenari daha əvvəl "YouTube" video platformasında da tətbiq edilmişdi və indi eyni mexanizmin "Telegram" üzərində sınaqdan keçirildiyi görünür.
Hazırda mesencer tamamilə bağlanmasa da, şəkillərin gec açılması və video zənglərdəki kəsintilər istifadəçi kütləsi arasında narahatlıq yaradıb. Ekspertlər hesab edirlər ki, əgər platforma rəhbərliyi ilə rəsmi Moskva arasında ortaq məxrəc tapılmasa, bu məhdudiyyətlər yaxın aylarda tam bloklanma ilə əvəzlənə bilər. Hələlik prosesin hansı istiqamətdə inkişaf edəcəyi barədə qəti hökm vermək çətin olsa da, mesencerin Rusiyadakı gələcəyi dumanlı görünür.
İsmayıl Demokrat.az
