Hansı idman federasiyalarında prezident seçkisi keçiriləcək? — ARAŞDIRMA

İDMAN 23 dek 2021, 13:29
Gənclər və İdman Nazirliyində nazir təyinatından sonra Azərbaycan idmanında müəyyən canlanma hiss olunur.

Artıq Milli Olimpiya Komitəsi (MOK) və 12 idman federasiyasında seçki keçirilib. Bunlardan 9-da federasiya prezidentləri dəyişib. Yalnız Atletika Federasiyası, Voleybol Federasiyası və Üzgüçülük Federasiyasında əvvəlki rəhbərlər yenidən bu posta seçilib. Yeri gəlmişkən, MOK və Atletika Federasiyasının analoji tədbirindən başqa, digərləri Gənclər və İdman Nazirliyinin inzibati binasında baş tutub.

Bəs Olimpiya idman növlərini təmsil edən federasiyalardan neçəsində yaxın günlərdə Hesabat-Seçki Konfransının keçirilməsi nəzərdə tutulur? Belə say 14-ə bərabərdir. Düzdür, bunlardan Otüstü Hokkey Federasiyası və Qolf Federasiyası, demək olar ki, fəaliyyət göstərmir. Ancaq həmin federasiyaların yenidən bərpa olunması istisna olunmur. Həmçinin fövqəladə hallar naziri Kəmaləddin Heydərovun prezidenti olduğu iki federasiyadan biri olan Taekvondo Federasiyasından ayrılacağı dəqiqdir.

Demokrat.az Oxu.Az-a istinadən onların siyahısını və hazırkı prezidentlərinin adlarını təqdim edir:

Azərbaycan Ağır Atletika Federasiyası – Cahangir Əsgərov

Azərbaycan Boks Federasiyası – Kəmaləddin Heydərov

Azərbaycan Dağçılıq və Ekstremal İdman Növləri Federasiyası – Hüseynqulu Bağırov

AFFA – Rövnəq Abdullayev

Azərbaycan Həndbol Federasiyası – Saleh Məmmədov

Azərbaycan Kamandan Oxatma Federasiyası – Şahin Möhsümov

Azərbaycan Milli Karate Federasiyası – Yaşar Bəşirov

Azərbaycan Otüstü Hokkey Federasiyası – Fazil Məmmədov

Azərbaycan Qolf Federasiyası – Bu federasiyada prezident postu boşdur

Azərbaycan Reqbi Federasiyası – Elşən Abbasov

Azərbaycan Atçılıq Federasiyası – Elçin Quliyev

Azərbaycan Stolüstü Tennis Federasiyası – Şahin Mustafayev

Azərbaycan Taekvondo Federasiyası – Kəmaləddin Heydərov

Azərbaycan Tennis Federasiyası – Oqtay Əsədov

Həmçinin yaxın illərdə Olimpiya idman növü kimi təmsil olunacaq kikboksinq və sambo federasiyalarında da növbədənkənar seçkinin olacağı istisna olunmur.

Qeyd edək ki, indiyədək Atıcılıq Federasiyası, Atletika Federasiyası, Milli Avarçəkmə Federasiyası, Basketbol Federasiyası, Cüdo Federasiyası, Güləş Federasiyası, Şahmat Federasiyası, Badminton Federasiyası, Voleybol Federasiyası, Qılıncoynatma Federasiyası, Triatlon Federasiyası və Üzgüçülük Federasiyasında Hesabat-Seçki Konfransı keçirilib.

Demokrat.az

SEÇİLMİŞ XƏBƏRLƏR

DİGƏR XƏBƏRLƏR

XƏBƏR LENTİ
Top