Elmira Axundovanın oğlunun açılmayan cinayət dosyesi... — Prokurorluq 4 ildir susur


KRİMİNAL 28 may 2021, 11:01
Azərbaycanın Ukraynadakı səfiri Elmira Axundovanın oğlu Həbib Axundovun yaxtasında baş verən ölüm işinin 4-cü ili tamamlanmaq üzrədir. Amma ötən müddət ərzində “Miss Lafarella” internet yarışmasının iştirakçısı, model Günel Rəşid qızı Mirzəyevanın hansı şəraitdə ölməsi araşdırılmamış qalıb.

Kim idi Günel Mirzəyeva? 


25 yaşlı Günel Mirzəyeva ölümünə qədər  Həbib Axundovla olduqca məhrəm münasibətlərdə olub. Bu, danılmaz faktdır və sosial şəbəkələrdə bu faktı təsdiq edən videolar var. Onun hamilə olması xəbərləri də yayılmışdı. 

Günel Mirzəyeva sirli ölümündən əvvəl ailəli olub. Bununla belə Həbib Axundov Günel Mirzəyevaya “Jeep Wrangler” markalı maşın bağışlayıb. Günel Mirzəyeva uzun müddət Həbib Axundovun adına olan Nəsimi rayonu, Vəzirov küçəsi 50 ünvanında yerləşən 3 nömrəli mənzildə yaşayıb. Həbib Axundovla sıcaq münasibətləri yaranandan sonra isə həyat yoldaşından boşanmaq üçün Sabunçu Rayon Məhkəməsinə ərizə verib. Onun məhkəmələrdə nümayədəsi kimi çıxış edən isə Həbib Axundovun anası Elmira Axundovanı məhkəmələrdə nümayəndə olaraq təmsil edən Rövşən Yusifov olub. 

Elmira Axundova təkzib və təsdiq edir...

26 iyun 2017-ci ildə Xəzər dənizinin Bilgəh qəsəbəsi ərazisində bu günə qədər sirri açılmayan ölüm hadisəsi baş verdi. Günel Mirzəyeva dəniz sahilindən 300 metr aralıda müəmmalı şəkildə suya düşdü. Xəbər mətbuat səhifələrinə çıxandan sonra Günel Mirzəyevanın Həbib Axundovla münasibətləri də gündəmə gəldi. Elmira Axundova tələsik mətbuata çıxıb oğlu ilə meyiti dənizdə axtarılan modelin əlaqəsini təkzib etdi. Dedi ki, mənim oğlumun bu ölümdən xəbəri olmayıb. Əlavə də etdi ki, bəs oğlum orada olsaydı, modeli dənizin dibinə getməyə imkan verməzdi, bəs oğlu üzgüçüdür. 

Növbəti gün isə Elmira Axundova yenidən danışdı. Bu dəfə də dedi ki, oğlum hadisə zamanı dəniz sahilində olub, Günel Mirzəyeva isə dənizdə üzən yaxtada. Ona görə də Günel Mirzəyeva suda boğulanda onu xilas edə bilməyib. 

Elmira Axundova təkzib və təsdiq çıxışları ilə oğlunu xilas etməyə çalışdığı vaxtda Fövqəladə Hallar Nazirliyinin dalğıcları dənizdə Günel Mirzəyevanın meyitini axtarırdı. Elmira Axundovanın sürücüsü Fərrux Adnayev isə Günel Mirzəyevanın yaşadığı binanın önündə keşik çəkirdi!

Səbəb də sadə idi: Axundova sürücüsünü Günel Mirzəyevanın qapısına göndərməklə onun evinə gedib-gələnlərin kimliyini nəarət altında saxlamağa, xüsusilə mətbuat nümayəndələrinin ora getməsini əngəlləməyə çalışırdı. Belə də olmuşdu. Əraziyə gedən mətbuat nümayəndələrinin qarşısını Adnayev kəsmişdi, ailənin jurnalistlərlə görüşmək istəmədiyi deməklə evə yaxın buraxmamışdı! 

Sual olunur: Elmira Axundovanın sürücüsü bunu özbaşına edə bilərdimi?  

Sonradan ortaya çıxan və bu günə qədər araşdırılmayan faktlar isə onu deməyə əsas verir ki, Günel Mirzəyeva dənizdə çabalayıb, boğulub imdad diləyərkən Həbib Axundov yaxınlıqdakı yaxtadan onu seyr edib. Faktiki olaraq Günel Mirzəyevanın həmin gün Bilgəhdə dənizdə, yaxtada olma səbəbi də məhz Həbib Axundov olub.

 Həmin günlərdə Axundovlar Günel Mirzəyevanın müəmmalı ölümünün mümkün qədər mətbuatdan kənar saxlamağa çalışırdı. Nəhayət, Günel Mirzəyevanın ölümü ilə bağlı Sabunçu Rayon Prokurorluğunda Cinayət Məcəlləsinin ehtiyatsızlıqdan adam öldürmə (124.1) maddəsi ilə cinayət işi başlandı.  Əslində isə faktlar iş üzrə daha ağır maddə ilə cinayət işinin başlanması üçün əsas verirdi. 

Bəs ehtiyatsızlıq edib Günel Mirzəyevanın ölümünə səbəb olan kim olub? Həbib Axundov yoxsa başqa biri? Dənizə Həbib Axundovun yaxtasında çıxan Günel Mirzəyevanın ölümünə ondan savayı kimsə bais ola bilərdimi?

 

Sirli ölüm işi baş verəndən az sonra modelin dənizə kiminlə, kimin yaxtasında çıxması haqda rəsmi qurumlardan yalnız Fövqəladə Hallar Nazirliyi uyğun mövqe nümayiş etdirib məlumat açıqladı. FHN-in jurnalist sorğusuna verdiyi cavab ümumilkdə Sabunçu Rayon Prokuroluğunun iş üzrə apardığı istintaqı şübhə altına qoyur. Sorğu üzrə FHN-ə ünvanlanan sualları və verilən cavabları təqdim edirik:

Sual:

- Günel Rəşid qızı Mirzəyeva 2017-ci il iyunun 26-da hansı markalı su nəqliyyatı vasitəsi ilə açıq dənizə çıxıb?

Cavab:

- 26 iyun 2017-ci il tarixdə Mirzəyeva Günel Rəşid qızının ölümü ilə nəticələnən bədbəxt hadisə K-45 adlı ABB 1278 bort nömrəli Yamaha 242 Limited S tipli gəzinti katerin dənizdə olması zamanı baş vermişdir.

Sual:

- Həmin su nəqliyyatı vasitəsi ölkəyə nə vaxt, kim tərəfindən gətirilib; kimlərin mülkiyyətində və istifadəsində olub?

Cavab:

- Göstərilən gəmi 01 iyul 2016-cı il tarixdə keçirilmiş texniki baxışın nəticələrinə əsasən Axundov Həbib Ramiz oğlunun adına dövlət qeydiyyatına alınmışdır. 17 iyul 2017-ci il tarixdə notarial qaydada təsdiq olunmuş alqı-satqı müqaviləsinə əsasən gəmi H.Axundovun adından dövlət qeydiyyatından çıxarılmışdır.

Sual:

– G.R.Mirzəyeva su nəqliyyatı vasitəsi ilə açıq dənizə çıxarkən həmin su nəqliyyatı vasitəsini kim idarə edib?

Cavab:

– Bədbəxt hadisə baş verən zaman gəminin sahibi H.Axundov gəmidə olub.

Sual:

– Həmin şəxsin su nəqliyyatı vasitəsini idarə etmək hüququ olubmu?

Cavab:

– Gəmi sahibi H.Axundov imtahan verərək 04 iyul 2016-cı il tarixdə Xidmətdən katerləri idarə etmək hüququ verən sürücülük vəsiqəsi almışdır.

Sual:

– Xəzərin Bilgəh qəsəbəsi hissəsində su nəqliyyatı vasitələrinin sahildən hansı məsafəyə qədər üzməsinə icazə verilir?

Cavab:

– Bu tip katerlərin texniki xarakteristikalarına görə sahildən uzaqlaşma məsafəsi 3 dəniz mili olduğu halda, Xəzər dənizinin xüsusiyyətləri nəzərə alınaraq gəmiyə Xidmət tərəfindən sahildən 2 mil üzmə məsafəsi icazəsi verilmişdir.

Sual:

-G.R.Mirzəyevanın ölümü ilə nəticələnən hadisə ilə bağlı rəhbərlik etdiyiniz nazirliyin müvafiq qurumunun səlahiyyət sahiblərinin məsuliyyəti müəyyən olunubmu?

Cavab:

- Gəmi dövlət qeydiyyatina alınan zaman ona keçirilmiş texniki baxış nəticəsində “istismara yararlı” qiyməti verilmişdir.

 Sözügedən katerin 8 nəfər sərnişin götürmə qabiliyyəti var, 8 sayda xilasedici canlıq və 1 sayda dairə ilə təhciz olunub. Bədbəxt hadisə baş verən zaman gəmi texniki cəhətdən saz vəziyyətdə olub. Bədbəxt hadisənin səbəblərinin və şəraitinin təhlili nəticəsində Xidmətin vəzifəli şəxslərinin məsuliyyəti müəyyən olunmamışdır.

Sual:

– G.R.Mirzəyevanın ölümü ilə nəticələnən olayın baş verdiyi gün onun sərnişini olduğu su nəqliyyatı vasitəsində kimlər olub?

Cavab:

– Mövcud qanunvericiliyə əsasən dövlət qeydiyyatına alınan kiçikhəcmli gəmi sahiblərinin və ya istifadəçilərinin Xidmət qarşısında dənizə çıxma vaxtı və sərnişinlər barədə məlumat vermək öhdəliyi yoxdur.

Sorğuya verilən cavabdan aydın olur ki, Günel Mirzəyeva açıq dənizə məhz Həbib Axundovun yaxtasında çıxıb. Hadisə baş verərkən Həbib Axundov Günel Mirzəyevanın yanında olub. Elmira Axundovanın dediklərinə inansaq, oğlu üzgüçüdür. Elmira Axundova əminliklə deyirdi ki, uzgüçü oğlu orada olacağı təqdirdə bədbəxt qızı xilas edərdi. Fakt ortaya çıxandan sonra Elmira Axundova susur.

Ən başlıca sual: Həbib Axundov niyə Günel Mirzəyeva ölümündən 21 gün sonra yaxtanı başqasının adına keçirib? Bu tələskənliyin səbəbi nə olub?

4 ilə yaxındır ki, Günel Mirzəyevanın sirli ölüm işi araşdırılmamış qalıb. Bu günə qədər də ictimaiyyətə Həbib Axundovun yaxtasında dənizə aparılan, hamilə olması xəbəri təkzib edilməyən modelin hansı şəraitdə suyun dibinə getməsi haqda rəsmi açıqlama verilmir. Həbib Axundovun anasının səfir olması da heç nəyi dəyişmir, Günel Mirzəyevanın sirli ölümü, nəhayət ki, araşdırılmalıdır.(Mənbə: Hit.az) 


DİGƏR XƏBƏRLƏR

XƏBƏR LENTİ
22 sen 2021, 23:37
Top