Hadrutda 900 yaşlı Şərq çinarı


MARAQLI 28 apr 2021, 21:29
Ekologiya və Təbii Sərvətlər Nazirliyinin (ETSN) təşkilatçılığı ilə işğaldan azad edilmiş Xocavənd rayonunun Hadrut qəsəbəsinə mediatur təşkil olunub.

“Report”un Xocavəndə ezam olunan əməkdaşının verdiyi xəbərə görə, nazirliyin sektor müdiri Mehman Nəbiyev jurnalistlərə Hadrut qəsəbəsində təbiət abidəsi kimi qeydə alınan 900 yaşlı Şərq çinarının ermənilər tərəfindən məhv edilməməsindən danışıb.

Onun sözlərinə görə, diametri 450 santimetr, hündürlüyü 40 metrdir: "Xocavənddə bu cür 12 təbiət abidəsi var ki, onlardan 7-si Şərq çinarıdır. Bu təbiət abidələri Azərbaycan SSRİ Nazirlər Sovetinin 1982-ci il 167 saylı qərarı ilə təbiət abidələri siyahısına daxil edilib. Monitorinq aparılan ərazilərdə 3 belə Şərq çinarının kəsilmədən saxlanıldığı aşkarlanıb. Əvvəlki ekspedisiyalardan məlum olub ki, Füzuli, Zəngilan, Cəbrayıl və Qubadlı rayonlarında təbiət abidəsi kimi qeydə alınan 138 təbiət abidəsindən 123-ü kəsilib. Onlardan da 117-si Şərq çinarıdır. Həmin rayonlarda olan təbiət abidələrinin demək olar, hamısı kəsilib, yandırılaraq məhv edilib. Hadrutda olan 3 Şərq çinarı isə turistləri cəlb etmək üçün qorunub saxlanılıb. Bu onu deməyə əsas verir ki, ermənilər Hadrut qəsəbəsində yaşadıqları üçün buradakı təbiət abidələrindən turistik məqsədlərlə yararlanıb və məhv etməyiblər. Ancaq yaşamadıqları ərazilərdə 2000 ilə yaxın yaşı olan təbiət abidələrini məhv ediblər".

"Zəngilan, Qubadlı, Cəbrayıl və Füzuli rayonlarında olan tarixi abidələrin isə yalnız pöhrələri qalıb. Burada mənfur düşmənin məqsədi həmin ərazilərdə azərbaycanlıların izlərini silmək olub. Ona görə də həmin ərazilərdə olan abidələri məhv ediblər", - M.Nəbiyev bildirib.

Mediatur başa çatıb.


DİGƏR XƏBƏRLƏR

XƏBƏR LENTİ
Top