Vahid Əhmədov: “Azərbaycan iqtisadi azadlıq indeksinə görə daha ön sıralara yüksələcək”


GÜNDƏM 06 mar 2021, 14:34
Heritage Fondunun hesabatına əsasən, Azərbaycan 2020-ci il üzrə iqtisadi azadlıq indeksində göstəricilərini yaxşılaşdırmış beş Avropa ölkəsi arasında birinci yeri tutub. Azərbaycan iqtisadi azadlıq qiymətləndirməsinə görə, 69,3 indekslə 180 ölkə arasında 44-cü yerdə qərarlaşıb.

Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bildirib ki, Azərbaycan yaxın gələcəkdə iqtisadi azadlıq indeksinə görə daha ön sıralara yüksələcək.

Deputat qeyd edib ki, Azərbaycanda son illər, xüsusilə 2020-ci ildə çox ciddi iqtisadi islahatlara start verilib: “Həm sosial-iqtisadi islahatlar, həm də qanunvericilikdə - vergi məcəlləsində, sahibkarlıq fəaliyyətində edilən dəyişikliklər iqtisadiyyatımıza təsirsiz ötüşmədi. Baxmayaraq ki, 2020-ci il dünyada koronavirus pandemiyası ilə əlaqədar ən ağır illərdən biri oldu, dünya iqtisadiyyatında azalmalar baş verdi. Azərbaycanda müvafiq qurumlar da bu məsələ ilə bağlı ciddi səylər göstərdi, dövlət tərəfindən sahibkarlara dəyən ziyanın qarşısı alındı. İndi işğaldan azad edilmiş ərazilərdə bərpa işləri ilə məşğul olmaq istəyən kifayət qədər böyük dövlətlər, böyük şirkətlər var. Azərbaycanda da şərait normal və stabildir. Heç bir ciddi problem yoxdur. Bu baxımdan, düşünürəm ki, sahibkarlığın inkişafı üçün Azərbaycanda münbit şərait mövcuddur. Biz planlaşdırırıq ki, 2021-ci ildə iqtisadi göstəricilərimiz daha da yüksəlsin”.

Deputatın sözlərinə görə, xüsusilə son vaxtlar aparılan kadr islahatları, gənc kadrların gətirilməsi də Azərbaycanda iqtisadi inkişafa müəyyən qədər öz təsirini göstərir: “İqtisadi azadlıq indeksinin cari ilin sonunda artdığını, bir neçə pillə də yüksəldiyimizin şahidi olacağıq. Təbii ki, bu artım cənab Prezident İlham Əliyevin müəyyənləşdirdiyi iqtisadi, siyasi və s. kimi islahatların həyata keçirilməsi nəticəsində baş verəcək, iqtisadi inkişafa şərait yaradacaq. Bu, bizim üçün çox böyük və əhəmiyyətlidir.  Belə davam etsək, yaxın gələcəkdə biz iqtisadi azadlıq indeksinə görə, daha ön sıralara yüksələ bilərik. Çünki nəzərə almaq lazımdır ki, iqtisadi cəhətdən inkişaf etmiş ölkələrə çatmaq asan məsələ deyil, üstəlik biz Vətən Müharibəsi aparmışıq, qalib dövlət kimi də həmin ərazilərimizi bərpa və inkişaf etdirmək üçün bizə maliyyə vəsaiti lazımdır. Problemlər öz həllini tapacaq və yaxın zamanlarda Azərbaycan 188 ölkə arasında 20-25-ci yerlər arasında qərarlaşacaq”.(pravda.az)

Demokrat.az

 

Loading...

DİGƏR XƏBƏRLƏR

XƏBƏR LENTİ
Top