
Qubada iri qaya parçaları yola düşərək nəqliyyatın hərəkətini dayandırıb.
Demokrat.az xəbər verir ki, "Təngə dərəsi" adlanan ərazidə dağdan qayaların aşınması nəticəsində 10-dan çox yaşayış məntəqəsinin rayon mərkəzi ilə əlaqəsi kəsilib.
Hazırda aidiyyəti qurumların əməkdaşları yolun açılması istiqamətində işlərə başlayıblar.
***10:51
Quba-Qonaqkənd yolunun hərəkət hissəsi qaya parçalarından təmizlənib, nəqliyyatın hərəkəti bərpa olunub.
Demokrat.az xəbər verir ki, aprelin 19-u səhər saatlarında Quba-Qonaqkənd avtomobil yolunun Təngəaltı kəndi ərazisində, sıldırım qayalıqlar arasından keçən hissəsində yolun hərəkət hissəsinə qaya parçaları düşüb.
İri qaya parçası "Təngə dərəsi" adlanan turizm ərazisindən keçən yeganə yolu tamamilə bağlayıb. Nəticədə 10-dan artıq yaşayış məntəqəsinin rayon mərkəzi ilə nəqliyyat əlaqəsi kəsilib.
Əraziyə Quba rayon Fövqəladə Hallar Komissiyasının nümayəndələri, Azərbaycan Avtomobil Yolları Dövlət Agentliyinin rayonda fəaliyyət göstərən qurumlarının texnikaları cəlb olunub.
Qaya parçaları xüsusi texnikalar vasitəsilə kiçik hissələrə bölünərək ərazidən kənarlaşdırılıb. Yolda avtomobillərin maneəsiz hərəkəti qismən təmin edilib. Hazırda yolun təmizlənməsi davam etdirilir.