Bakıda kababçını öldürən müştəri ilə bağlı yekun qərar verildi

Bakının Nizami rayonunun Keşlə qəsəbəsində kababçını qətlə yetirməkdə ittiham olunan Rəhman Qəhrəmanovun apellyasiya şikayətinə baxılıb.

Demokrat.az-ın əldə etdiyi məlumata görə, bu gün Bakı Apellyasiya Məhkəməsində hakim Zamin İbrahimovun sədrliyi ilə keçirilən prosesdə qərar elan edilib. Qərara görə, təqsirləndirilən şəxsin cəzasının yüngülləşdirilməsi barədə verdiyi apellyasiya şikayəti təmin edilməyib.

Qeyd edək ki, Bakı Ağır Cinayətlər Məhkəməsində keçirilən sonuncu iclasda hökm oxunub.Hökmə əsasən, R.Qəhrəmanov xuliqanlıq niyyəti ilə adam öldürməkdə təqsirli bilinərək 17 il azadlıqdan məhrum edilib.

Kabab davasına görə məhkum edilən 34 yaşlı Rəhman cəzasını ciddi rejimli cəzaçəkmə müəssisəsində çəkəcək.

Xatırladaq ki, hadisə bu ilin aprelində baş verib. İttihama görə, qətlə yetirilən Anar Quliyevlə Rəhman Qəhrəmanov arasında kababa görə dava düşüb.

Anar Keşlə qəsəbəsində kababçı işləyirmiş. Rəhman onun işlədiyi yerə kabab yemək üçün gəlibmiş. Amma ətin tamı xoşuna gəlmədiyi üçün, aralarında mübahisə yaranıb. Mübahisə sonradan kababçının ölümünə gətirib çıxarıb.

Fariz Məlikli
Demokrat.az