Xankəndi şəhər 1 nömrəli körpələr evi-uşaq baxçasına 80 nəfərdən çox müraciət olunub. Ölkə başçısının açılışında iştirak etdiyi baxça yaxın günlərdə fəaliyyətə başlayacaq.
Bizim.Media-nınn yerli bürosu xəbər verir ki, bu barədə Qarabağ Regional Təhsil İdarəsinin müdiri vəzifəsini icra edən Anar Məcidov jurnalistlərə açıqlamasında bildirib.
“Prezident İlham Əliyevin Qarabağa sonuncu səfəri zamanı açılışı olan obyektlərdən biri Xankəndi şəhərində 1 nömrəli körpələr evi-uşaq bağçasıdır. Elm və Təhsil Nazirliyinin sifarişi ilə bu ilin mayında Xankəndi şəhəri körpələr evi-uşaq bağçasının əsaslı təmirinə başlanılıb. Məktəbəqədər təhsil müəssisəsinin layihəsi 80 yerlik olmaqla 0,21 hektar ərazini, 1340 kvadratmetr ümumi sahəni əhatə edir. Burada 4 qrup otağı, tibb otağı, metodiki kabinet, mətbəx, akt və idman zalları və camaşırxana yaradılıb. Artıq körpələr evi-uşaq bağçasına 80-dən artıq müraciət daxil olub”, - deyə o qeyd edib.
